Umiiarneq: Angut ataaseq toqungasoq nassaarineqartoq
NAL. 13:30 NUTARTERNEQARPOQ: Politiit nalunaarutigigaluarpaat ajutoorneq Kangaatsiap Kujataani pisimasoq. Kingornali Kitsissunnguini pisimasoq nalunaarutigaat.
Juulip arfernani nalunaaqutaq 15.36 Aasiaat Ilulissallu akornanni Kitsissunnguini angallammik kiviartortoqartoq ikiorneqarnissamillu pisariaqartitsisut Kalaallit Nunaanni politiit Aasiaat Radioannit ilisimatinneqarput.
Politiit tusagassiuutinut taama ilisimatitsipput.
Kingorna annaassiniarneq politiit angallataannik, Air greenlandimit Issittup sakkutuuiniillu peqataaffigineqartoq aallartinneqarpoq. Taakku saniatigut innuttaasut arlallit aamma ujaaseqataallutik.
- Ajutoorfimmi angallat kivisimavoq, politiit ilisimatitsipput.
Issittup sakkutuuisa inuk ataaseq uumasoq immamit qulimiguulimmik qaqissinnaasimavaat napparsimmavimmukaallugulu. Annattoq maanna peqqinnissaqarfimmit nakorsarneqarpoq.
Ajutoorfiup nalaani inuk alla 69-inik ukiulik ajunaareersimasoq nassaarineqarpoq.
Inuit pingasut suli ujaarineqarput. Tassa angutit marluk arnarlu ataaseq. Angutip aappaa 35-inik ukioqartoq arnarlu 67-inik ukioqartoq politiit ilisimatitsipput.
Ilaqutaasut ilisimatinneqareerput.
Ajutoorfimmi eqqaanilu politiit ujaasinertik ingerlatiinnarpaat.
AAMMA ATUARUK Inuit sisamat Qeqertarsuup Tunuani ajunaarsimassangatinneqartut
