Ulluunerani paaqqinnittarfiit ilungersuasut: Soraarninngoreersimasut aaqqiissutissat ilagisinnaavaat

Nunatsinni ulluunerani paaqqinnittarfinni sulisussaaleqingaatsiartoqarnera isertuussassaanngilaq, Kommuneqarfik Sermersuumi aamma sulisussaaleqisoqarpoq.

Ulluuneranili paaqqutarinniffik Puiaq ikiortissamut amigaateqarnermini allatut eqqarsarniarsimavoq.

Tassanimi 68-inik ukiulik, Kaalat Olsen Hansen siorna soraarninngoreersimasoq atorfinitsinneqarsimavoq.

- Angerlarsimallunga uninngaannarsinnaannginnama, eqqarsalerpunga takoriarakku facebookimi Puiami sulisussanik amigaateqartut, Kaalat Olsen Hansen oqarpoq.

Kaalat Olsen Hansen Puiami sulisut allat assigalugit sulisarpoq. Assi © : KNR / Sebastian Trosborg

Kaalat Olsen Hansen ukioq manna januaarimi sulilerpoq. Taassuma facebookikkut sulisussarsiornermut allagaq takugamiuk suliffissarsiorniarluni aalajangerpoq, sulittaarporlu.

Aalajangernerlu tamanna imminut pitsaasuusimanerarpaa.

- Inuttut naleqassusera inuiaqatigiinnullu ikiuukkusullunga taamaaliorpunga, Kaalat Olsen Hansen oqarpoq.

Taanna ullaat tamaasa 07:00-imit 09:00-imut sulisarpoq, piffissamilu qaninnermi nalunaaqutaq 15:00-imit 17:00-imut aamma ikiuuttalernissaa pilersaarutaavoq.

Kaalat Olsen Hansen soraarninngoreernikuusoq taamaammallu ulloq naallugu sulissanngitsoq  meeqqat ilisimavaat.

- Asanninneq tunniukkusuttorujussuuara meeqqanut aamma takusinnaavara tigulluarsimagaat taamatut suleriaaseqartunga, taanna oqarpoq.

Kommuneqarfik Sermersuup nittartagaa naapertorlugu ulluunerani paaqqutarinniffimmi Puiami meeqqat 64-iupput, sulisullu 15-iullutik. Assi © : KNR / Johansinnguaq Olsen

Naallu Kaalat Olsen Hansen perorsaanermik ilinniagaqanngikkaluarluni ulluunerani paaqqinnittarfinni ullup ilaani sulisalernissamik qinnuteqarnera nalaatsornerinnaanngilaq.

- Siornatigut meeqqanik sullissinikuuvunga, pisariaqartitsisut, weekendini paarisassat, sivisuumik paarisassat, taavalu tassanngaannaq takkunik paarsisarnikuuvunga, taanna oqarpoq.

Illuatungeriinnut tamanut pitsaasuusoq

Nunatsinni ulluunerani paaqqinnittarfinni sulisussaaleqisoqarnera nutaarsiassaanngilaq. Angajoqqaat sulisussaaleqisoqarnerani ikiuuttariaqartarnikuupput.

Sulisunik ilinniarsimasunik amigaateqarneq suli ilungersunarpoq, Puiamilu tamanna taamaapppoq, uanilu allatut iliornissamik nassaartoqarsimavoq.

- Utoqqaat aamma pisariaqartippaat inuit akornanni suli akuunissartik.  Taamaammat soqutigisani aallavigalugu uagutsinnut saaffiginnissiimammat qujanartorujussuuvoq.  Imatut ilinniagarinngikkaluarpaa kisianni meeqqanut akuunissani nuannaarisorujussuuvaa, Puiami aqutsisoq, Lydia Mathiassen, oqarpoq.

Kaalat Olsen Hansenip ulluunerani paaqqutarinniffimmi Puiami tamanut nuannaarutaavoq, tassanilu aalajangersimasumik ammaasartussamik matusisartussamillu pisariaqartitsisoqarpoq.

- Uagutsinnut sulisunut meeqqanullu isumaqaqaaq. ammaajuaannartussaasoq aamma piffissap ilaani matusiuaannartussaasoq nalunngilarput, Lydia Mathiassen oqarpoq.

Lydia Mathiassenip Kaalat Olsen Hansen ulluunerani paaqqinnittarfinni ammaasartussatut matusisartussatullu januaarimi atorfinitsippaa. Assi © : KNR / Johansinnguaq Olsen

Kaalat Olsen Hansen sulisut sinneri assigalugit naleqartinneqartutut misigisimavoq, taamaammallu atorfik soraarninngorsimasunut allanut aamma innersuussutigerusuppaa.

- Meeqqat malugisinnaavara nuannarigaannga, aamma toqqissisimasuugama meeqqanut tunniussassaqarlunga. Meeqqallu qanilaarfigisarpaannga nuannaralunga, taanna oqarpoq.