Danmarkimi kommune kalaallinut angajoqqaanut nalileeriaasiusumik atorunnaarsitsivoq

Tarnip pissusiinik ilisimasallit, apersuisinnaapput, oqaloqatiginnissinnaapput nakkutiginnissinnaallutillu - kisianni kalaallinut angajoqqaajusunut nalilersuineq isornartorsiorneqartartoq atorsinnaanngilaat, Esbjergip kommuneani taama aalajangerpungut, Esbjergip kommuneani Innuttaasoqarnermut suliffeqarnermullu pisortaq, Lise Willer KNR-imut taama oqarpoq.

- Kalaallinik ilaqutariinnik nalilersuisarneq pillugu oqallinnerit, tusagassiuutini attaveqatigiittarfinnilu malinnaaffigaagut. Piffissap ilaani saaffiginnittut ilisimasagullu ataatsimut katersorpagut, isumaqatigiissutigaarpullu ilaqutariinnik nalilersuinermi periutsip isornartorsiorneqartup unitsikkallarneqarnissaa.

Danmarkimi Inuit Pisinnaatitaaffii pillugit Institutti, Danmarkimi kommunenut tallimanut kalaalersaqarnersanut allagaqarpoq, taakkununnga esbjergip kommunea ilaavoq, allagaqarnerup kingorna periutsimik unittitsigallarnissamik aalajagiisoqarpoq.

Allakkami KNR-ip takusimasaani, kalaallinut angajoqqaanut nalilersueriutsimik atuisoqannginnissaa, Esbjergep kommuneanit kaammattuutigineqartoq allassimavoq.

Ileqqut inuttullu naliginnaasumik pissusissatut isigineqartut allamiorpaluttut, taakku aallaavigalugit tarnip pissusianik nalilersueriutsit ineriartortinneqarsimapput. Kulturikkut allamik tunuliaqutaqarneq, soorlu kalaallit Nunaanneersuuneq, paasinnittaaseq allaammat paatsooqatigiittoqarneranik pilersitsisinnaavoq. Nalilersueriuserlu Danmarkip inuunermi atukkanik ilisimatusarfianit VIVE-p nalunaarusiaani, 2022-meersumi isornartorsiorneqarpoq.

Kingornalu naalagaaffik nalilersuissutissamut nutaamut aningaasanik immikkoortitsisimavoq, taannali qaqangu naammassineqassanersoq ilisimaneqanngilaq.

Isorinnittoqarnera kalaallinut angajoqqaanut iluaqutaassaaq

Esbjergip Kommuneani kalaallinit meeqqat, angerlarsimaffiup avataanut inissinneqartussatut suliassanngortinneqartut ikittuararsuupput, pisortaq Lise Willer taama oqarpoq.

Ilaqutariinnut kalaallinut nalilersuinerit, kommunemi suliani kukkunikkut atorneqarsimanersut taassuma ilisimanngilaa.

- Paatsoortoqarsimasinnaaneranik oqaaseqarnissatsinnut misilittakkanik ilisimasanillu erseqqissunik amingaateqarpungut. Kisianni maannakkut atorunnaarsitsigallarneq, nalunartut pillugit iliuuseraarput.

- Nassuiaanerluttoqarneranik paatsoortoqarneranillu isumaliortoqarpat, isumaqarpunga tamanna tusaaniarneqartariaqartoq. Kissaatigaarput angajoqqaat piginnaasaannik naliliineq qularnaatsuussasoq, taanna oqarpoq.

Nalilersueriuseq isornartorsiorneqartoq misissuinermut annertuumut ilaavoq, taaneqartoq angajoqqaat piginnaasaannik nalilersuineq, danskit kommuneqarfiisa meeqaamik angerlarsimaffiup avataanut inissiinissamik isumaliuteqarunik suliarissallugu pisussaaffeqarput.

KNR-ip siusinnerusukkut oqaluttuarereerpaa kommunit namminneq aalajangersinnaasimanngimmassuk, angajoqqaat qanoq piginnaasaqarnersut nalilersornissaannut periusissiat sorliit atorneqassanersut.

Meeqqat pillugit inatsit Danmarkimi atuutilermat tamanna allanngortinneqarpoq. Inatsimmik paasinninneq naapertorlugu, tarnip pissusaanik ilisimasallit ataasiakkaat, angajoqqaat meeqqamik paarsinissaminnut piginnaasaannik nalilersornissaannut, periusissianik tulluarnerusunik toqqaanissaminnik periarfissaqalerput.

Maannamiillu Esbjergip kommuneani taama iliortalissapput.

- Nalilersueriutsit matumani maanna tikillugu isornartorsiorneqarsimanngisaannarput. Qujanartumillu! Kiisami! Maannakkut atortussanut taarsiullugu sukaterisoqalerpoq, Lise Willeri taama oqarpoq.

Tarnip pissusianik ilisimasalinnik innersuussutit piviusorsiunngitsut

Inuit Pisinnaatitaaffii pillugit Instituttip allakkamini allassimavaa, kalaallit angajoqqaat meeqqamik paarsinissamut piginnaasaasa nalilersornissaat eqqarsaatigalugu, kommunit tarnik pissusaanik ilisimasalinnik ilinniarsimasunik, kalaallit kulturiannik ilisimasalinnik atuisariaqartut.

Taamatulli innersuussineq Esbjergip Kommuneani malinneqarsinnaanngilaq. Kommunemimi innuttaasut akornanni assigiinngitsunik tunuliaqutit 100-t sinnerlugit amerlassuseqarput, tarnip pissusianik ilisimasalillit tamaasa ilisimanissaannut naammanngillat.

- Tarnip pissusaanik ilisimasallit, kalaallinut immikkut ilisimasaqarluavissunik peqarsinnaanissaq piviusorsiornerunngilaq. Sapaatip akunnerani tullermi Somaliami inuit pineqarsinnaapput, tullinnguuttooq sunaasinnaavorluunnit, taamaattumik oqariartuut taanna malinniarnagu aalajangerimavungut, Lise Willeri oqarpoq.