Danmarkimi ministerip kalaallit meerartaasa allamut inissinneqaratarsinnaanerannik suliaq erloqissutaammat paasivaa
Kalaallit angajoqqaat meeraasa allamut inissinneqaratarsinnaanerannik Danmarkimi kommunit nalileeriaasitaassannik ineriartortitsinissamik politkkikkut isumaqatigiissiortoqarmalli ukioq ataaseq qaangiussimalerpoq. Nalilersueriaasitaassat ukioq 2023 naatinnagu piareersimasussaagaluarput.
Tassa maanna nalilersueriaasiusut suli atuupput.
Kalaallit angajoqqaat meeraasa allamut inissinneqarsinnaanerat eqqarsaatigalugu angajoqqaanik naliliiniarnermi maanna nalilersueriaasiusut kalaallit kulturiannik eqqarsaatiginninnani suliaasut taamaannerallu kalaallit angajoqqaat paatsoorneqarnerannik taakkulu pillugit isummanik pigiuliutiinnagaqartoqarneranik kinguneqarsinnaasut, Danmarkip inuunermi atukkanik ilisimatusarfiata VIVE-p nalunaarsuiamini siornarnisami isornartorsiorpai.
Taamaakkaluartoq Danmarkimi kommunit nalileeriaasitaassaat suli piariinngillat. Taamaanneralu isornaqisoq, Folketingimi ilaasortaq Siumumeersoq suliarlu taannarpiaq pillugu danskit isumaginninnermut ministeriannut Pernille Rosenkrantz-Theilimut (S) apeqquteqaaseqarsimasoq Aki-Matilda Høegh-Dam isumaqarpoq.
- Suliaq erloqissutaasoq soorunami paasivara, suliarmi erloqinarluinnartuuvoq, Pernille Rosenkrantz-Theil Aki-Matilda Høegh-Damip apeqquteqaataanut Folketingimi pingasunngornermi akissuteqarami oqarpoq.
Nalilersueriaasitaassat taakkua eqqortumik suliaralugit piareerneqarnissaat pingaartuusoq, isumaginninnermut ministerip aamma erseqqissaatigaa.
Nalilersueriaasitaassammi taakkua oqaatsitsinnut kulturitsinnullu naleqqussarneqassapput, taamaaliornissamullu immikkut ilisimasalinnik suleqateqarnissaq pisariaqartoq suliarlu pisariusoq, taanna isumaqarpoq.
- Nalilersueriaasitaassammi naleqqussarluarneqanngippata nutaanik ajornartorsiuteqalersitsisinnaavoq, Pernille Rosenkrantz-Theil aamma oqarpoq.
Suliami susoqarpa?
Ministerip nutaanik nalilersueriaasitaarnissap pisariaqavinneranik paasinninnera qujarukkini, Aki-Matilda Høegh-Dam oqarpoq. Suliamili susoqarpiarsimanersoq, taassuma apeqqusernartippaa.
- Suliami tassani siornali suli nikeriaqqittoqarsimarpasinngilaq. Nukingisaarigattalu aatsaat nikeriallattaartoqarpasippoq, Aki-Matilda Høegh-Dam KNR-imut oqarpoq.
Nalileeriaasitaassat qaqugu piareernissaannut piffissaliissallutik, isumaginninnermut ministeri oqarpoq.
Danmarkimi kommunit meeqqanik allamut inissiinissamik naliliiniarnermi angajoqqaat kulturiannik oqaasiinillu eqqarsaatiginnittussaatitaareertut, taassuma ilanngullugu erseqqissaatigaa.
- Kommunit taamaaliortussaatitaanerannik soorunami erseqqissaavigisarpagut, taamaaliortussaatitaasullu ilaqutariit aamma paasitittarpagut, Pernille Rosenkrantz-Theil oqarpoq.
Pernille Rosenkrantz-Theil suliaq pillugu apersorumagaluarparput, itigarlutali.
Kalaallit angajoqqaat meeraasa allamut inissinneqaratarsinnaanerannik Danmarkimi kommunit nalileeriaasitaartinniarlugit siornali sunik iliuuseqartoqarsimanersoq maannalu nalilersueriaatsit atorunnaarsinniarneraat apererusukkaluarparput.
Danmarkip isumaginninnermut ineqarnermullu aqutsisoqarfia qaammarsaatitaanik ukiup massuma aallartinnerani saqqummersitsivoq, Danmarkimilu kalaallit ilaqutariit oqartussanut attaveqarnermi nalaassinnaasaat suunersut kalaallisut qaammarsaatitaani nassuiarneqarput.
Ilaqutariit kalaallit Danmarkimiittut meerartaat allamut inissitat ilaqutariit qallunaat meerartaasa allamut inissitaasut tallimariaatigaat.
