Danmarkimi suliani meeqqanut tunngasuni susoqartarpa? Qaammarsaatitaani tamanna nassuiarneqarpoq

Illersuisut. Suliarinnittut. Suliat meeqqanut tunngasut.

Taaguutit taakku Danmarkimut noorlaat kommunimut saaffiginnikkaangamik tusakkajussinnaasaannut ilaapput. Danmarkimimi oqartussat aaqqissuussaanerat Danmarkimi kalaallinut ilaqutariinnut paasiuminaassinnaasarput. 

Qaammarsaatitaat naqitat pingasut videollu arfinillit tamatuma ajornartorsiutaajunnaarnissaanut iluaqutaaniartussaassapput. Qaammarsaatitaat taakku januaarip ulluisa 22-anni saqqummersinneqartut, Danmarkip isumaginninnermut ineqarnermullu aqutsisoqarfiata siornali suliniutaanneersuupput.

Danmarkimi oqartussanik attaveqarnermi ilaatigut killigeqqusat, malittarisassat pisinnaatitaaffiillu qaammarsaatiliani nassuiarneqarput.

- Danmarkimi kalaallit ilaqutariit oqartussanut attaveqarnermi nalaassinnaasaat suunersut kalaallisut nassuiarneqarput, Danmarkip isumaginninnermut ineqarnermullu aqutsisoqarfiata siunnersortaanera suliniummilu tassani aamma aqutsisuusoq Maria Winther Pedersen oqarpoq.

- Ilaatigut kommunimut attaveqarnermi susoqartarnersoq, inunnik sullissisumik suleqateqarnermi nalaassinnaasaat suunersut ikiorneqarnissamillu periarfissaat suunersut nassuiarneqarput, taanna oqarpoq.

Tamakkorpiaat Danmarkimi kalaallit ilaqutariit meerartalllit, inuunermi atukkatigut artorsartut allarluinnarmilluunniit artorsaatillit kommunimut attaveqarsimasortaannut maannamut nassuiarnissaat oqitsuinnaasarsimanngilaq.

Eva-Kristina Petersen meeqqanilu marluk Danmarkimut aasaq nuutsigatik nunatsinniitillutik ikiortissamik ujaasigami iluamik ikiorneqarsimanngilaq. Taamaammat Danmarkimut nuukkamik ikiortissaqarluarluni paasigamiuk nuannaarpoq. Piffissalli ingerlanerani nuannaarunnaarluni siooralerpoq.

- Danmarkimut pigatta ikiortissaqarluarlunga paasigakku, kisianni ingerlanerani paasivara kalaalerpassuit arsaagaasartut. Taava taanna annilaangassutigilerpara, taanna oqarpoq.

Eva-Kristina Petersenimi kommunimut attaveqarnermi paasineqanngitsutut nalornisutullu misigisimasimasunut ilaavoq.

- Ilisimareersimasuugukku illersuisoqarnissannut pisinnaatitaaffeqarlunga, taava immitsinnut paatsooqatigiissimassanngikkaluarpugut, taanna oqarpoq.

Sulianilu taakkunani paatsooqatigiinnerit oqaatsitigut kulturikkullu assigiinngissuseqarnermik aallaaveqakkajuttut, Maria Winther Pedersen erseqqissaavoq.

- Meeqqanik perorsaanermi isiginninnermilu assigiinngissuteqarneq pissutaasinnaavoq. Ilaqutariit kalaallit Danmarkimi oqartussat aaqqissuussaanerannik aamma oqartussat oqaatsit akunnerminni atugaannik paasiuminaatsitsisortaqarsinnaasartut aamma nalunngilarput, taanna oqarpoq nangillunilu: 

- Oqartussanut aamma tutsuiginninngitsortaqarsinnaasarput, tamannalu suleqatigiinniapiloornermik kinguneqarsinnaasarpoq. 

Kommunimilu suliamik aallartitsisoqartillugu tataannartoqarataannaanissaanut siooralersartut oqartussanut tutsuiginninngilersarput.

Qaammarsaatit meeqqat ingerlalluarnissaannut pingaaruteqarmata Danmarkimi ilaqutariit kalaallit meerartallit kommunimilu oqartussani sullissisut oqaloqatigiilluarnissaannik suleqatigiilluarnissaannillu qularnaarisussaassasut, Maria Winther Pedersen oqarpoq.

Annilaanganeq siooranerlu

Danmarkimi kalaallit ilaqutariit meerartallit suliamik meeraannut tunngasumik aallartitsisoqarsimatillugu paasineqanngitsutut misigisimasortaqartartut, kalaallit meerartaannik sullissiniaqatigiit qaammarsaatilioqataasimasut oqarput.

Suliamik meeqqamut tunngasumik aallartitsineq sumiginnaasoqarneranik allatulluunniit ingerlanerliortoqarneranik pasitsaassisoqarneranik pissuteqakkajuppoq.

- Susoqarpiarnersoq paasinngikkaanni siooralersoqartarnera pissusissamisooqaaq, peqatigiiffik Kalaallit Meerartaata Aalborgimi immikkoortuani pisortaq Jeppe Bülow Sørensen oqarpoq. Peqatigiiffik taanna kalaallit meerartaasa nunatsinniittut Danmarkimiittullu atugarissaarnissaannik suliaqarfiuvoq.

- Kommunimi suliat meeqqanut tunngasut arsaarinninnermik kinguneqartut tusarsaapput. Aap, meeqqat ilaat angerlarsimaffiup avataanut inissinneqartarput, aammali angerlarsimaffiup avataanut inissinneqanngikkaluarlutik ikiorneqartartut amerlapput, taanna oqarpoq

Pisinnaatitaaffii nassuiarneqartut 

Qaammarsaanermik suliniuteqarneq Danmarkip inuunermi atukkanik ilisimatusarfiata misissueqqissaartarfiatalu, Det Nationale Forsknings- og Analysecenter for Velfærdip (VIVE), nalunaarusiaminik 2022-mi saqqummeereernerani aallartippoq, Danmarkimilu kalaallit ilaqutariit kommunillu akornanni akimmiffiit kulturikkut oqaatsitigullu assigiinngissuseqarnermik aallaaveqakkajuttut nalunaarusiami tassani erseqqissarneqarpoq.

Qaammarsaatitaat Danmarkimi ilaqutariit kalaallit meerartallit kommunimut attaveqartillutik suliamik meeqqanut tunngasumik aallartitsisoqariaraangat annilaannginnissaannut iluaqutaassasut, Jeppe Bülow Sørensenip neriuutigaa.

- Qaammarsaatit taakku oqartussat aaqqissuussaanerannik, aamma ikiorneqarnissamik periarfissat pisinnaatitaaffiillu Danmarkimi kalaallinut ilaqutariinnut nassuiaataapput.

Assersuutigalugu susoqarneranik paatsuungatillutik illersorteqarsinnaatitaallutillu oqalutseqarsinnaatitaasut naqitani ersarissarneqarpoq.

Naqitat angajoqqaajusunut sammitinneqarput, soorlu suliani meeqqanut tunngasuni susoqartarnersoq qanoq ilisukkulluunniit meeqqamik angerlarsimaffiup avataanut inissiisoqartarnersoq nassuiaatigineqarluni, videolialli meeqqanut qulit 17-illu akornanni ukiulinnut sammisunngorlugit nassuiaataapput.. Taakkunani laatigut kommunit atuuffii aamma meeqqanut inuusuttunullu siunnersorti sulerisorpiaanersoq nassuiarneqarput.