Kalaallit angajoqqaat meeraasa allamut inissinneqaratarsinnaanerannik Danmarkimi kommunit nutaamik nalileeriaaseqalernissaat suli ilimanarsinngilaq.

Nalilersueriaatsit, kalaallit kulturiannut oqaasiinullu naleqqussagaasussat, pilersaarutit naapertorlugit ukioq 2023 naatinnagu piareersimasussaagaluarput.

Nalilersueriaasissalli qaquguujumaarnersumut kinguaattoorput. Taamaanneralu ernumanartoq, Folketingimi ilaasortaq Siumumeersoq Aki-Matilda Høegh-Dam danskit isumaginninnermut ministeriannut tamannarpiaq pillugu apeqquteqaaseqarsimasoq oqarpoq.

- Tamanna sumiginnaanertut isigineqarsinnaavoq, inuppassuimmi suliamit tassannga angisuumit eqqugaapput, taanna oqarpoq.

Danmarkip naalakkersuisui nalilersueriaatsinik kulturitsinnut naleqqussagaasussanik ineriartortitsinissamut atugassanik 7,8 milliuunit koruuninik aningaasaliimmatali ukioq ataaseq qaangiutereerpoq.

Nalilersueriaatsinik nutaanik ineriartortitsisoqarnissaanik Folketingimi ilaasortat nunatsinneersut marluk, IA-meersup Aaja Chemnitzip aamma Siumumeersup Aki-Matilda Høegh-Damip, Folketingimi siorna marsimi isumaqatigiinniutigineqarnerani piumasarereeraallu taamaaliorput.

Suliaq sukkanerusumik suliarineqapallassinnaasimagaluarpoq

Kalaallimmi angajoqqaat meeraasa allamut inissinneqarsinnaanerat eqqarsaatigalugu angajoqqaanik naliliiniarnermi maanna nalilersueriaasiusut kalaallit kulturiannik eqqarsaatiginninnani suliaasimanerarlugit, Danmarkip inuunermi atukkanik ilisimatusarfiata, VIVE-p kattuffiillu allat isornartorsiorpaat.

Taakkualu taamaannerat meeqqqanik allamut inissiiniarnermi aalajangiisuusumik paaatsoornermik kinguneqarsinnaasut suliassaqarfimmut ilisimasallit oqarput. Ilaqutariit kalaallit Danmarkimiittut meerartaat allamut inissinneqartut ilaqutariit qallunaat meerartaasa Danmarkimiittut tallimariaatigaat.

Taamaammat Aki-Mathilda Høegh-Damip nalileeriaasiliornerup naammassinissaaanut ulluliinissaq ujartorpaa, ajornanngippallu 2024 naatinnaguusinnaanerarlugu.

- Suli ulluliisoqanginnera suliamik pingaaqisumik kinguartitsinertut isigaara. Suliarlu taanna sukkanerusumik suliarineqapallassinnaasimassagaluarpoq, suliami tassani sulisut naammattut inissinneqalertorsimasuuppata, taanna oqarpoq.

Danmarkimi kommunit maanna nalileeriaasiusoq angajoqqaanik kalaallinik naliliinissamut atatillugu atorunnaartariaqaraat, Aki-Matilda Høegh-Dam aamma isumaqarpoq.

Danskilli isumagininnermut ministeriat, Pernille Rosenkrantz-Thiel (S), suliami tassani aalajangiisinnaasutuaavoq.

Aki-Matilda Høegh-Dam, kalaallit ilaqutariit pillugit suliani maanna nalilersueriaatsit atorunnaarsinneqarpata kommunit arajutsisaqarataannaasinnaannginnerpat?

- Uffa naliliissut kulturitsinnut naleqqussagaasoq taama inerniliuussutaassanngikkaluartoq naliliineq ataaseq aalajangiissutaappat, taava equngasoqassaaq. Paarlattuanilli angajoqqaajulluartunik meeqqaminnik kukkusumik tunngaveqarluni arsaagaasunik arajutsisaqarsinnaavugut, taanna oqarpoq.

KNR-ip isumaginninermut ministeri Pernille Rosenkrantz-Theil suliaq pillugu apersorumagaluarpaa itigarlunili.

Nalilersueriaatsinik nutaanik ineriartortitsinissamik suliami aalajangiinissamut tunngaviusussamik 2024-mi misissueqqaartoqassasoq, ministeri Folketingip Kalaallit Nunaat pillugu ataatsimiititaliaanut akissummini ilisimatitsivoq.

Suliaq taanna Folketingimi pingasunngorpat oqallisigineqassaaq.