Ulloq unnuarlu paaqqinnittarfimmi Marte-Moe atorneqarpoq

Marte-Meo periuseq tassaavoq, meeqqat ataasiakkaat eqqarsaatigalugit taakku inoqatiminnut attaveqarniarneranni ineriartornissaat meeraanerminnilu toqqissisimasumik inuuneqalernissaannik anguniagaqarnermi sakku atorneqarsinnaasoq.

Meeqqat kinguaassiutimikkut atornerlunneqarsimasut sullinneranni pingaaruteqartut ilagaat, meeqqat sullinneqarneranni sulisut tamarmik assigiiaamik suleriuseqarnissaat.

Taama oqarpoq, ulloq unnuarlu paaqqinnittarfimmi perorsaasoq, Mette Knudsen.

- Pigaaruteqarpoq uanga meeqqap pissusilersuutaanik takusara suleqatinnut oqariartuutigissallugu, suleqatikkalu takusannut qanoq oqaasissaqarnersut paasissallugit pigaaruteqarluni. Tassami meeqqamut assigiinnerusumik suliaqassaggutta oqaloqatigiittarneq pifaaruteqapoq, Mette Knudsen taama oqarpoq.

Ulloq unnuarlu paaqqinnittarfik Pitu, manna ukiut pingajussaa ingerlareerpoq, meeqqallu katillugit 16-nit maanna paaqqutarineqalutik.

Tarnip pissusaanik ilisimasalinnik ikiorteqarluni pikkorissarnerit ingerlanneqartarput

Meeqqat atukkamikkut ileqqulersuutimikkullu assigiinngittarmata meeqqat ataasiakkaat aallaavigineqarlutik sulisut perorsaasullu sakkussaannik tuniorarneqarnissaat pingaaruteqartoq, Pitumi pisortaq, Iisaavaraq Petrussen oqarpoq.

- Meeqqanut inissiisarfik aallartikkatsiguli sulisutta piginnaanngorsarnissaat eqqarsaatigalugu tarnip pissusaanik ilisimasalinnit ikiorteqarluat pikkorissartittarpavut. Tassami meeqqat sulligut tunuliaqutsimikkut assigiinngitsupilussuupput tassalu taakku aallaavigalugit sulisugut sakkussaannik tuniorarniartarlutigit, Iisaavaraq Petrussen oqarpoq.

Tassalu periuseq Marte-Meo atorlugu Pitumi sulisut maanna pikkorissartinneqarput.

Meeqqat atorfissaqartitaa aallaavigineqassapput

Meeqqat kiguaassiutimikkut atornerlunneqarsimasut ikiorserniarneqarnissaat imaannaanngitsuusoq, Pitumi sulisunut pikkorissartitsisoq, tarnip pissusaanik ilinniarsimasoq, Jette Waagner oqarpoq.

- Meeqqat inersimasumit pakkunneqarnissaminnik pisariaqartitsisarput, soorlu uangut meeqqagut taama pillugit eqqissisimalersittarigut, meeqqalli ilaasa nalunngilaat, pakkunneqarnissamik pisariaqartitsillugit inersimasoq pakkukkunikku tamanna pinngitsoorani arlaannik akilerneqartariaqartoq. Tassalu tamannarpiaq tarnimikkut artorsaatigisartagaat, Jette Waagner oqarpoq.

Meeqqat Pitumi paaqqutarineqartut, ilaquttaminnillu inersimasunilluunniit allanit kiguaassiutimikkut atornerlunneqarsimasut, inoqatiminnut tatiginninnerat annikittuaraasartoq, Mette Knudsen oqarpoq imalu nangilluni.

- Meeqqat piffissaqarfigineqarnissartik pisariaqartittarpaat. Aamma pisariaqarluni meeqqap killiffia aallaavigalugu taassuma ikiorlugu naapinnissaa. Naammagittarluta meeqqap suna oqariartuutiginiarneraa utaqqisarparput, taamaalilluta arriitsunnguamik sullinniartarlutigu,Pitumi perorsaasoq, Mette Knudsen taama oqarpoq.

Ulloq unnuarlu meeqqanik paaqqinnittarfik, Pitu Nuummi Tasiilamilu immikkoortortaqarfeqarpoq.