Ukiumoortumik ataatsimiilerput
Kina-mi inatsisartut – Folkekongressep – ukiumoortumik ataatsimiinnissartik ullumi aallartippaat.
Ministeriunerup Wen Jiabao-p ammaanersiorluni oqalugiaataa avatangiisit illersorneqarnissaannik sukkasuumillu ineriartortitsinissamut neriorsuuterpassuarnik imaqarpoq.
Aammattaaq Kina-p – pisortatigoortumik – naalakkersuisuisa kommunistiusut piitsut ikiorniarpaat – aamma peqatigisaanik pisuut pigisaqarnissaat qulakkeerniarpaat inuttut ataasiakkaatut piginnittussaatitaanerup nutaamik inatsisiliuunneratigut.
Kina gassinik silaannarmik kissakkiartortitsisunik nunarsuatsinni aniatitsisut annerpaartaata tullersortigaa. Kisianni ministeriunerup Djau Bais-ip neriorsuutigaa sulliviit mingutsitsivallaartut matuneqassasut neriorsuutinilu ima erseqqissarpai.
- Ukiunut tulliuttunut tallimanut pilersaarummi kiassaateqarfiit minnerusut 50 million kilowattinik piginnaanillit matoorarniarpavut. Ukiup matuma ingerlanerani kiassaateqarfiit 10 million kilowattinik piginnaanillit matoorarnissaat anguniarparput, ministeriuneq oqarpoq.
Kina-miut naalakkersuisuisa aamma kissaatigaat suliffissuit soorlu saviminiliorfiit, sisaliorfiit, aluminiuliorfiit cementiliorfiillu arlallit matuneqarnissaat. Tamanna naalakkersuisunut unammillernartuuvoq, tassami naalakkersuisut kikkut tamarmik suliffissaqarnissaat maanna sulissutigimmassuk.
Ministeriunerup ammaanersiorluni oqalugiarnera aatsaat taamak sivisutigaaq, tassami nalunaaquttap akunneri marluk minutsillu 15-it sivisussuseqarami.
Aammami innuttaasunut assigiinngitsorpassuarnut neriorsuutissarpassuaqarami. Peqqinnissamik suliaqartut 87 procentinik amerlanerusunik aningaasaliiffigineqassapput, piitsut napparsimalersinnaanermut sillimmaserneqassapput, ilinniartitaanermullu aningaasaliissutit 47 procentimik amerlineqassapput, ilaatigut inuusuttut piitsut millionilikkaat nunaannarmiut ilinniagaqarsinnaaniassammata.
Peqatigitillugu Kinamiut pisoorsuartaasa pigisatik qulakkeersinnaanngussavaat. Tassami Kinap naalakkersuisui pappilissatigut kommunistiusut inuit ataasiakkaat pigisaqarsinnaanerannut tunngasumik inatsisiliorniarmata.
- Inuit ataasiakkaat sullivinnik piginnittuusinnaanerat taamaalilluta tapersersorlugulu aqqutissiuussinnaavarput, ministeriuneq oqarpoq. Tamanna Kina-mi inatsisartunit marsip ulluisa 16-anni taasissutigineqassaaq.
