Ukioq manna saqqummiussillaqqinneqqusaatsitsisussaq peqataasussarsiorpoq
- Juunip aallaqqaataaniit qinnuteqarfissaalissaaq, pissanganartunillu qinnuteqaaterpassuaqassasoq neriuppugut. Ukioq kingulleq qinnuteqartoqangaarmat peqataasussanik toqqaanissaq nalorninarsimaqaaq.
Paasisavut 2024-mik aaqqissuisumi Arctic Hubimi allattoqarfimmi pisortaq, Julla Maegaard Hoffmann oqarpoq.
Paasisavut ilisimatusartut saqqummiinermi unammineraat. Taanna – nunarsuarmit tamaneersunut – nunatsinnut toqqaannartumik atassuteqartumik ph.d-liortunut imaluunniiit ukiut marluk kingulliit iluanni ph.d-mik naammassisaqarsimasunut tamanut ammasuuvoq.
Piukkunneqarnerpaat tallimat saqqummiinermik unamminissamut toqqarneqassapput.
- Ph.d-nngorniallu qanoq pissanganartumik nuannersumillu ilisimatusaatiminnik minutsit tallimat iluinnaani saqqummiussillaqqinnerusinnaanerannik unammersuaannginnerminni siunnersortimit sungiusarneqassapput. Julla Maegaard Hoffmann oqarpoq.
Paasisavut siorna siullerpaamik aaqqissuunneqarpoq. Ph.d-nngorniat tallimat ilisimatusarnerminnik ajornaatsumik aliikkusersuerpalaartumillu Katuami saqqummiussipput.
Oqaluttuatut saqqummiussisoqassasoq
Ukioq kingulleq saqqummiussillaqqinnerpaanngortoq 37-nik ukiulik, Nick Duelund Ilisimatusarfimmeersoq nunatsinni meeqqat isigisinnaassusaat qanoq innersoq, qanorlu siunissami misissorneqartarnissaat pillugu ph.d-liani saqqummiuppaa. Taanna saqqummiussilluarnerpaanngorami 25.000 koruuninik akissarsitinneqarpoq.
- Ilikkagara pitsaanerpaaq qanoq saqqummiussinissaq. Arlaannik ilisimatusaraanni paasisat inernerilu aalajangersimasuullutillu annikitsortaaloqarmata saqqummiunnissaat ajoralaarsinnaavoq, Nick Duelund oqarpoq.
Taamaammat ukioq manna peqataasussanut siunnersuutissaqarpoq:
- Saqqummiussassaa arlaatigut oqaluttuaasariaqassagami imatut inernerit asuli saqqummiutiinnarnagit oqaluttualiorluni, taamaalilluni saqqummiussineq aamma nuannernerussaaq pissanganarnerullunilu, Nick Duelund oqarpoq.
Saqqummiussillaqqinnerpaaniunnermut qinnuteqarfissaq septembarip aallaqqaataanut killeqarpoq. Saqqummiussillaqqinniuunneq Nuummi Katuami KNR TV-kkullu novemberip 13-ani isiginnaarneqarsinnaajumaarpoq. Uani annerusumik atuagaqarsinnaavutit.
