Paasisavummi ajugaasoq: Oqariartuutiga maanna suli siammasinnerulersissinnaavara
Nick Duelund suleqatiminit isumassarsitinneqarpoq.
Nuummi napparsimmavimmi nakorsatut ukiuni arlalinni sulereerluni suleqataata kalaallit meerartaasa isilunnerat pillugu suliaqartoqalersoq oqaluttuuppaa.
Meeqqanilu isigiarluttuuneq Nick Duelundip ilisimasaqarfigilluarpaa.
Taassuma meeraanermini nunarsuaq ersernerluttuusoraa, aatsaalli meeqqat atuarfianni atualereerluni isigiarsuttuulluni paasivaa.
- Eqqaamaqqissaarpara ulloq manna tikillugu allattarfissuarmi ilinniartitsisoq allattuisoq allagai takorpiarsinnaanagit, naqinnerit suuneri ersippallaanngitsut. Tamanna ilikkarniarnissamut ajornakusoortitsilaarpoq, Nick Duelund oqarpoq.
Nick Duelundip isigisai pitsaavallaanngitsut aatsaat 1. Klassimi paasineqarpoq.
Taassuma nunarsuaq qanoq isikkoqaraluarnersoq maanna oqaluttuarisinnaavaa, kingunitsianngualu isaruartaarpoq.
Isaruartaarami nunarsuaq nutaaq ammarpoq. Suna tamarmi ersarissillunilu erseqqarissivoq, atuartitsinermullu malinnaaniarneq aamma ajornaannerulerluni.
- Suna tamarmi ajornaannerulerpoq, ilikkarniarnerlu ajornaannerulerluni, susoqarnerami maanna takusinnaalerpara, taanna oqarpoq.
Ilisimatusaatigalugu suliaq
Nick Duelund nakorsatut ilinniarsimavoq, Nuummilu napparsimmavimmi sulisimalluni.
Nick Duelundilli ilisimatusarneq 2017-imi toqqarpaa. Taassuma kalaallit meerartaat tamarmik meeqqat atuarfianni atualinnginnerminni qanoq ilillutik misissortissinnaanersut misissorlugu aallartippaa, paasineqajaarpatami pitsaanerussammat.
- Piffissaatillugumi paasineqanngippat isigiarsuttuujualernermik kinguneqarsinnaavoq. Tamatuma saniatigut aamma ilisimavarput isigiarluttuugaanni atuarfimmi angusarissaannginnerusoqartartoq. Tamanna ilisimatusarnikkut uppernarsarneqarnikuuvoq, Nick Duelund oqarpoq.
Meeqqanit ukioqatigiiaanit tamanit 8 procentii isaruaqarnissamik pisariaqartitsisut ilisimatusarnerup takutippaa. Nunatsinnili isit nakorsaannik amigaateqarneq pissutigalugu meeqqat taakku kingusissukkut aatsaat paasineqartarnerat ajornartorsiutaavoq.
Isillu nakorsaat nunatsinniittut suliassaqangaatsiarlutillu taakkununnga utaqqisorpassuupput.
Taamaammat Nick Duelund allatut eqqarsarpoq, inuussutissarsiuteqartunilu allani aamma isinut tunngasuni ullut tamaasa suliaqartuni aaqqiissutissamik nassaarluni.
Isarualerisut aaqqiissutissaasut
Taassuma isarualerisut eqimattat peqatigalugit Uummannaq, Ilulissat, Sisimiut, Nuuk, Qaqortoq Tasiilarlu tikeraarpaat. Illoqarfinnilu taakkunani isarualerisullu meeqqat sisamanik ukiullit tamarmik meeqqerivinniittut misissorpaat meeqqallu isigisaat naliliiffigalugit.
Nick Duelundip ph.d-liaa suli naammassineqanngilaq, kisianni meeqqat isigiarsuttut siusissukkut ikiorneqarsinnaanissaannut isarualerisut paasisaqareersinnaasut maanna takusinnaalereerpaa.
- Ingerlanneqarsinnaasoq takusinnaareerparput, isarualerisut misissuisartuusinnaapput, Nick Duelund oqarpoq.
Isarualerisut meeqqat isigisaannik misissuillutillu naliliisinnissaat siunertaavoq. Taakku meeqqat isigiarsuttut paasigunikku isit nakorsaannut innersuussuteqassapput, meeqqat taamaalillutik atualinnginnerminni piffissamik tunineqarsinnaassallutik.
Maanna ajugaasutut
Paasisavut nunatsinni siullerpaamik pingasunngormat aaqqissuunneqarpoq.
Nick Duelundillu ph.d-mik suliaqartut allat sisamat peqatigalugit ilisimatuutut suliatit tamarmik immikkut saqqummiuppaat, taakkulu suliat tamarmik nunatsinnut attuumassuteqartuupput.
Ilisimatusartut tallimat ilisimatusaatigisatik kalaallinut inuiaqatigiinnut saqqummiullugit unammissutigaat.
Ilisimatusartut ilisimatusarnerminnik ilisimatusarnermi oqariartuutaanut allannguinngitsumik sunniuteqartumik ajornaatsumillu nassuiaateqarnissamut periarfissinneqarput, taamaaliornissamullu katillugit minutsinik tallimanik tunineqarlutik.
Saqqummiisussat tamarmik naammassimmata ajugaasorlu toqqagaasussanngormat Nick Duelund toqqarneqarpoq.
- Tulluusimaarpunga, taamaalillungalu oqariartuutiga suli siammasinnerulersissinnaavara, Paasisavummi ajugaasoq oqarpoq.
Nick Duelundip nammineq misigisimasaminik oqaluttuarluni isiginnaartunut saqqummiilluarsinnaanini tiguaalluarsinnaaninilu ajugaassutigaa. Nick Duelund ajugaasutut toqqarneqarnermi saniatigut 25.000 koruuninillu pissarsisoq oqariarneq ajulerluni oqarpoq.
Suliaqarnera maanna nanginneqaqqissaaq. Paasissutissat tamarmik katersorneqarlutillu misissoqqissaarneqassapput, ilisimatuutullu suliaata piviusunngortinneqarnissaa tullinnguutissaaq.
- Piviusumik oqarusuppunga siusinnerpaamik ukiup tulliani. Kisianni erngertumik aallartinnissarput pingaaruteqarluinnarpoq. Ukiorpassuit matuma siornali aallartereersimasussaagaluarpugut, kisianni kinguaattoorluta aallartereerpugut, Nick Duelund oqarpoq.
