Nick Duelund ilisimatusartut unammineranni saqqummiilluarnerpaasoq
Nick Duelundip kalaallit meerartaasa isigiarsuttuunerat pillugu ilisimatusarnini ilisimatusartut saqqummiilluarnerpaaniuullutik Paasisavummi unammineranni ajugaassutigaa.
Unammineq Arctic Hubimit Ilisimatusarfimmiillu aaqqissuunneqarpoq, Paasisavummilu siullerpaamik ippassaq unammisoqarluni. Tamanna Nuummi Katuami aaqqissuunneqarpoq.
Nick Duelund ilisimatusartut tallimat ajugaaniuttut ilagaat. Ilisimatusartut ilisimatusarnerminnik ilisimatusarnermi oqariartuutaanut allannguinngitsumik sunniuteqartumik ajornaatsumillu nassuiaateqarnissamut katillugit minutsinik tallimanik periarfissaqarput.
Nammineq isigiarsuttuunermik misilittagaqartoq
Nick Duelundip nammineq meeraanermini isigiarsuttuunini oqaluttuaraa.
- Kalaallit meeqqat atuartut pingasuugaangata marluk uattulli ullumikkut isigiarsuttuusarput. Taakku isigiarsuttuunerat paasineqarneq ajorpoq, taakkulu namminneq aamma nalusarpaat. Taakkulu isigiarsuttuunerat atuarneranni paasineqanngikkuni tamanna taakkununnga navianarsinnaavoq, inuunermimi sinneranni isigiarsuttuujualersinnaapput, Nick Duelund Paasisavummi saqqummiinermini oqarpoq.
Taamaammat Nick Duelundip ilisimatusarnermini kalaallit meeqqat tamarmik meeqqat atuarfianni atualinnginnerminni qanoq ilillutik isigisaminnik misissortissinnaanerat misissorpaa.
Nunatsinni isit nakorsaat amigaataasut, nunatsinniittullu utaqqisoqangaatsiarnera pissutigalugu ulikkaaqqangaatsiarlutik. Nick Duelundip taamaammat nunatsinni isarualerisut taakkulu piginnaasaat ukkatarai.
Taassuma isarualerisut eqimattat peqatigalugit Uummannaq, Ilulissat, Sisimiut, Nuuk, Qaqortoq Tasiilarlu tikeraarpai. Illoqarfinnilu taakkunani isarualerisullu meeqqat sisamanik ukiullit tamrmik meeqqerivinniittut misissorpaat meeqqallu isigisaat naliliiffigalugit.
Ph.d suli naammassineqanngitsoq
Nick Duelundip ph.d-liaa suli naammassineqanngilaq, kisianni meeqqat isigiarsuttut siusissukkut ikiorneqarsinnaanissaannut isarualerisut paasisaqareersinnaasut maanna takusinnaalereerpaa.
- Meeqqat isigisaat erseqqarinneruguni taakku atuarfimmi ilikkariartornerat ajornaannerussaaq, Nick Duelund saqqummiinini naggaserlugu oqarpoq.
Nick Duelundip isiginnaartunut saqqummiilluarsinnaanini tiguaalluarsinnaaninilu ajugaassutigaa.
Nick Duelund ajugaanermini nersornaammik 25.000 koruuninillu pissarsisoq oqariarneq ajulerluni oqarpoq.
- Qujanarujussuaq, nuannaaqaanga, taanna oqarpoq.
Unamminerat tamaat KNR.gl-ikkut uani isiginnaarsinnaavat.
