Ukiakkut ataatsimiinneq aallartippoq: Broberg ammaanersiornermi oqalugiaammi eqqaaneqanngitsoq

Danmarkimik isumalluuteqartoqaannassanersoq pillugu siunissami taasisoqassagaluarpat naggueqatigiinnik inunnik tunuliaqutaqartut kisimik taasisinnaasariaqarneranik naalakkersuisup, Pele Brobergip oqaaseqarnera Naalakkersuisunut kinguneqaataassava?

Tamanna ukiakkut ataatsimiinnermi ulloq siulleq ataatsimiittoqareersoq suli akissutissarsineqanngilaq.

Naalakkersuisut siulittaasuat Brobergip Berlingskemit ilanngutassiamik aallaaveqartumi assuarliorneranut atatillugu sapaatip akunnerata tulliani aatsaat oqaaseqarniarpoq.

- Naalakkersuinikkut pisoqarpat, nutaamillu oqariartuutissaqarpat, Naalakkersuisut siulittaasuattut oqariartuuteqarumaarpunga, Múte B. Egede oqarpoq.

KNR-ip Pele Broberg ullumi aamma oqaloqatiginiaraluarpaa. Taassuma tamanna itigartitsissutigalugu Múte B. Egede innersuussutigaa.

AAMMA ATUARUK Ukiaanerani ataatsimiinneq Brobergimillu isornartorsiuineq: Ullumikkut ima pisoqarsinnaavoq

- Oqalugiarninni ilimasaarivunga, sapaatip akunnerata tulliata aallartinnerani pisussamik Inatsisartut siulittaasoqarfiannut qinnuteqarlunga.

- Naalakkersuisut katitigaanerannut tunngasunik, aaqqissuusseqqinnissamik, aammalu meeqqanut inuusuttunullu naalakkersuisussamik ikkussinissamut siunertaqartumik qinnuteqaateqarsimallunga.

Naalakkersuisuusimasoq, Eqaluk Høegh uippakajaarnini pissutigalugu qaammatip ataatsip matuma siorna tunuarpoq.

Pele Broberg pilersaarutini ilaava?

- Taamanikkussamut takussavarsi. Taamanikkussamut aaqqissuussineq saqqummiunneqarumaarpoq, Inatsisartut siulittaasoqarfiannut massakkut qinnutigisimasagut suut tamaasa ilanngullugit pillugit siorngerlugit oqaaseqassanngilanga.

Assi © : Malik Brøns, KNR

Eqimattat Pele Brobergimut tapersersuiartorlutik takkupput. Assi: Malik Brøns

Naalakkersuisoqarfinni pissutsit ilungersunartutut illit nammineq taasinnaavigit?

- Oqaatigissavara, massakkut suliat ingerlariaqqinnissaannut tunngasunut oqaatigisimasagut suli tunngavigivagut. Naalakkersuisoqatigiit inuiaat pillugit pitsaanerpaamik ingerlariaqqinnissaat tunngavissinniarlugu suliat saqqummiunneqarumaarput.

Arlaannik oqaaseqarnissat inuiaqatigiit utaqqikatakkaat paasisinnaaviuk?

- Soorunami paasisinnaavara, kisianni Naalakkersuisut siulittaasuata Naalakkersuisut katitigaanerannut, aammalu Inatsisartut ataatsimiinnerat aqqutigalugu, suliassaq taanna naammassisussarimmagu, Inatsisartunullu oqaluuserisassanngortitsinermik tunngaveqartumik naammassineqartussaammat. Taannaavoq aallaavigisassarput. Taava massakkut suleriaaseq soorunami suleriaaserisarput ataqqillugu ingerlavugut.

AAMMA ATUARUK Politikkimut malinnaasoq: Naalakkersuisuni sakkortuumik toqqissiviilliortoqarpoq

Kisianni uagut inuiaqatigiittut tunngavissatsinnik Naalakkersuisuni susoqarnissaanik arlaannik oqaaseqarsinnaanngilatit?

- Taanna ilimasaarutigivara sapaatip akunnerata tulliata aallartinnerani Inatsisartunut saqqummiussinnaajumallugu Inatsisartut siulittaasoqarfiannut qinnutigisimallugu.

Sapaatit akunnerata tulliata aallartinnera qaquguuva?

- Tassa Inatsisartut siulittaasoqarfiata qinnuteqaat tigusimalerpaa. Tassanngaanniillu takujumaarparput qaqugu oqaluuserisassanut ikkukkumaneraat.

Taava aalassanneq pillugu ullumikkut oqaaseqarusunngilatit?

- Oqaatigisassakka oqaatigereerpakka.

Oqarputit meeqqanut, inuusuttunut ilaqutariinnullu naalakkersuisumik innersuussiniarlutit, taannalu Inatsisartut siulittaasoqarfiannut ingerlassimallugu. Taassuma saniatigut meeqqanut inuusuttunut naalakkersuisoq eqqarsaatiginagu allanik naalakkersuisunik nikititeriniarpit?

- Inatsisartut siulittaasoqarfiata qinnuteqaatiga akuerisimaleriarpagu pisortatigoortumik saqqummiunneqarumaarpoq.

Assi © : Malik Brøns, KNR

Pele Broberg nunanut allanut tunngasunut naalakkersuisuuginnassanersoq nassuiaateqarfigineqarani politikkikkut ukiakkut ataatsimiinneq taamaalilluni aallartippoq.

Partiit ikorfartortaasup Atassutip taassuma tunuarnissaa Múte B. Egedelu nikititerinissaa piumasaraa.

Naleraq IA-lu aamma isumaqatigiinngilluinnarsinnaapput – Brobergillu assuarliornera qinersisoqarneranik kinguneqarsinnaalluni. Inuit Ataqatigiimmi Inatsisartuni ataatsimik amerlanerussuteqalaaginnarput. Taamaattoqarnissaanullu Naleeqqamit Naalakkersuisunut qinikkat sisamat pissutaapput.

Naalakkersuisut taamaalillutik qaammatini arfiliinnarni atuutereerlutik ikinnerussuteqalersinnaasut, Radioaviisimi aaqqissuussisoq, Jens Thorin naliliivoq.

AAMMA ATUARUK Berlingske: Pele Broberg kukkusumik issuanngilarput

Múte B. Egedellu Siumup siulittaasua Erik Jensen Naalakkersuisunik nutaanik isumaqatigiinniarnissamut aamma periarfississinnaavaa - taamaalillunilu Naalakkersuisunut siulittaasuunissamut piviusumik tunniutiinnarluni partiit annersaata tullianut ingerlatitseqqissalluni.

Aammattaaq Siumut Demokraatillu nutaamik naalakkersuisoqatigiinnik pilersitsinissamut isumaqatiginiarsinnaavai.

- Tamannali ilimanarpallaanngitsoq, Jens Thorin oqarpoq.

- Qinersinermi uranimik piiaanissamut tunngassuteqarpoq, tassanilu Siumut Demokraatillu akuersaartuusut Inuit Ataqatigiit Nalerarlu akerliusuupput.

 Suliaq naatsumik:

• Aviisip Berlingskep nunanut allanut naalakkersuisoq Pele Broberg apersorsimallugu sapaammi saqqummiuppaa.
• Taanna apersorneqarneqarnermini oqarpoq eqqartortikkusullugu Kalaallit Nunaata siunissami namminiilivinnissaanut taasisitsinermi kikkut taasisinnaatitaasariaqassanersut. Kalaallinit kingoqqisut kisimi taasisitsinermi peqataasinnaasariaqartut, Pele Broberg oqarpoq.
• Taamali oqaaseqarnera Múte B. Egedep (IA), naalakkersuisunut siulittaasuusup, sakkortuumik akerlilerlugu ullup ingerlanerani naqqiuteqarfigaa. Aatsaallu siullerpaamik Pele Brobergimut akerliliivoq.
• Atassutip Pele Broberg naalakkersuisunit tunuartinniarlugu naalakkersuisuni nikittoqartariaqarneranik ataasinngornermi piumasaqarpoq.
• Demokraatillu taasisinnaatitaanermut oqaatigineqartut 'ajorluinnartutut' taavaat.
• Pele Brobergilu Facebookimi takkajaarsuarmik ataasinngornermi unnukkut allaaserisaqarpoq. Tassani allassimasoq Berlingskep allaaserisamini 'isummanik' allanngortitsimasoq. Pele Brobergillu nammineq aamma 'inuiaat namminiilivinnissamut taasitinneqarnissaanni Inuit kisimik taaseqataasinnaasariaqarnerarlugit' issuarneqarsimani eqqunnginnerarpaa.
• Berlingske allaaserisamini isummanik allanngortitsisimanani KNR-imut ataasinngornermi ilisimatitsivoq.