Ukiaanerani ataatsimiinneq Brobergimillu isornartorsiuineq: Ullumikkut ima pisoqarsinnaavoq

Pisoqanngilaataani suna tamarmi nipaappoq. Sapaatiummammi pisoqangaatsiareersoq suna tamarmi aalassatsinneqarpoq.

Tassami nunanut allanut naalakkersuisoq, Pele Broberg, Berlingskemut oqaaseqarpoq. Nunatsinni namminiilivissinnaanermut kikkut taasisinnaatitaassanersut oqallisigineqartariaqarneranik oqaaseqarpoq. Naggueqatigiinnit inunnit kingoqqisut kisimik taamaaliorsinnaatsitaassasut Pele Brobergip Berlingskemut oqaatigaa.

AAMMA ATUARUK Aaja Chemnitz Larsen: Pele Brobergip oqaasimigut Kalaallit Nunaat innarlerpaa

Taamaasillunilu Nuummi politikkikkut oqallittoqangaatsialerpoq. Naalakkersuisuni siulittaasoq, Muté B. Egede, tassani naalakkersuisoqatini akerlilerngaarpaa. Pele Brobergi kikkut taasisinnaatitaanissaanik isumaa Naalakkersuisunit politikkerineqanngitsoq allakkatigut akissuteqaatigimmagu.

Ullut tallimat qaangiussimalerput. Sulili nalunarpoq Muté B. Egedep Pele Broberg naalakkersuisuniitiinassaneraa.

Partiini ikorfartuutaasoq Atassut Pele Brobergimut tatiginnikkunnaarnertik nalunaarutigaat. Naalakkersuisuujunnaarnissaa naalakkersuisullu taarserneqarnissaanik Atassummi siulittaasoq Aqqalu Jerimiassen isumaqarpoq.

Imaaliallannerinnarmi ajalusoorsinnaapput

Naalakkersuisut taarserneqassanersut suli Muté B. Egedep akisinnaanngikkallarpaa.

- Pisoq massakkut nipangiussimatinniarsarivaa, Jens Thorin, radioaviisimi aaqqissuisoq taama naliliivoq.

Pele Broberg nunanut allanut naalakkersuisuutikkunnaarlugu aamma allatut naalakkersuisunngortissinnaavaa.

AAMMA ATUARUK Naliliineq: Brobergip pititsinerani ima pisoqarsinnaavoq

Periarfissaq alla, Naleqqakkut IA-lu isumaqatigiinngissutaat, aajuna - Brobergimut isornartorsiuineq qinerseqqinnermik kinguneqarsinnaavoq. IA-kummi ataatsimik issiatitassamik amigaateqarlutik ikippallaarput. Tamannalu Naleqqamit sisamanik naalakkersuisuutitaqarnermik qulakkeerneqarpoq.

Taamaasillunilu ukioq qiteqqutiinartoq naalakkersuisuutitaqarneq ajalusooriaanaavoq.

Periarfissarli alla aamma tassaavoq Múte B. Egedep Siumup siulittaasuanut Erik Jensenimut kaammattuuteqarsinnaanera Naalakkersuisunik nutaanik ivertitsinissamut isumaqatigiinniarnissamut - taamaalilluni imminut Naalakkersuisutut siulittaasuujunnaartissaaq, partiillu anginerup tullianut Siumumut pisinnaatitsissummik ingerlatitseqqiissalluni.

Aamma nutaamik Naalakkersuisunngortitsiniarluni Siumumik Demokraatinillu isumaqatigiinnialersinnaavoq.

- Taanna piviusorsiornerunngikkaluarluni aamma periarfissaavoq, Jens Thorin oqarpoq.

- Qinersineq uranitalinnik piiaanermut tunngavoq, tassani Siumut aamma Demokraatit illuatungaaniipput, akerlianillu IA aamma Naleraq akerliullutik.

Múte nersornaaserneqartoq

Muté B. Egedemita suniarpa? Ukiamut ataatsimiinissaq ullumikkut aallartissaaq, partiini ikorfartortaa Atassut illuatungiliuttullu Demokraatit akissutissarserusupput. Taamaakkaluartoq Naleqqakkut naalakkersuisuutitaqaanarusuttut, Naleqqakkut partiini oqaaseqartartua Jens Napaattooq oqarpoq. 

Politikikkulli anorersuarsiorneq pileruttortoq 34-nik ukiulik, Múte B. Egede, Namminersorlutik Oqartussat nersornaasiuttagaannik kuultiusumik sisamanngornermi nersornaaserneqarpoq.

AAMMA ATUARUK Berlingske: Pele Broberg kukkusumik issuanngilarput

Inatsisartut siulittaasuat, Hans Enoksen (N), Múte B. Egede tunniusimalluni naalakkersuinikkut suliniarsimanera piffissallu sivikitsuinnaap ingerlanerani naalakkersuisut siulittaasuattut ataqqinartumik atuuffeqalersimanera pissutigalugit nersornaammik tunniussaqartuuvoq.

- Qinikkatut maannamut sulisimanerit eqqarsaatigalugu inuusunnerit – 34-iinnarnimmi ukioqaravit - siullertut maluginiarneqarnerusarpoq, minnerunngitsumik naalakkersuinermik malinnaasut akornannit. Tamatuma takutippaa piffissami sivikitsumi sulilu inuusuttuugaluarlutit naalakkersuinikkut annertuunik kusanartunillu angusaqareersimasutit, Hans Enoksen Múte B. Egedemut nersornaammik tunniussinermini ilaatigut taama oqarpoq.

Suliaq naatsumik:

• Aviisip Berlingskep nunanut allanut naalakkersuisoq Pele Broberg apersorsimallugu sapaammi saqqummiuppaa.
• Taanna apersorneqarneqarnermini oqarpoq eqqartortikkusullugu Kalaallit Nunaata siunissami namminiilivinnissaanut taasisitsinermi kikkut taasisinnaatitaasariaqassanersut. Kalaallinit kingoqqisut kisimi taasisitsinermi peqataasinnaasariaqartut, Pele Broberg oqarpoq.
• Taamali oqaaseqarnera Múte B. Egedep (IA), naalakkersuisunut siulittaasuusup, sakkortuumik akerlilerlugu ullup ingerlanerani naqqiuteqarfigaa. Aatsaallu siullerpaamik Pele Brobergimut akerliliivoq.
• Atassutip Pele Broberg naalakkersuisunit tunuartinniarlugu naalakkersuisuni nikittoqartariaqarneranik ataasinngornermi piumasaqarpoq.
• Demokraatillu taasisinnaatitaanermut oqaatigineqartut 'ajorluinnartutut' taavaat.
• Pele Brobergilu Facebookimi takkajaarsuarmik ataasinngornermi unnukkut allaaserisaqarpoq. Tassani allassimasoq Berlingskep allaaserisamini 'isummanik' allanngortitsimasoq. Pele Brobergillu nammineq aamma 'inuiaat namminiilivinnissamut taasitinneqarnissaanni Inuit kisimik taaseqataasinnaasariaqarnerarlugit' issuarneqarsimani eqqunnginnerarpaa.
• Berlingske allaaserisamini isummanik allanngortitsisimanani KNR-imut ataasinngornermi ilisimatitsivoq.