Prorektor: Ilinniagaq isummanik pigiliutiinnagaarutsitseqataassaaq
Ilinniartut Ilulissani Perorsaanermik Ilinniarfimmeersut, SPS, ilinniartullu Aarhusimi pædagog-, socialrådgiver- og brobyggeruddannelsenimeersut isiginnaartitsissut ”Ilulissamit oqaluttuat” takutimmassuk, Kalaallit danskillu imminnut tunngasunik isummersuutit pigiliutiinnartagaat paatsooqatigiittarnerilu erserlualerput.
Isiginnaartitsissut kalaallit danskillu imminnut naapinnerat pillugu oqaluttuarineqarnissaanik siunertalimmik ataatsimiisitsinermut ilaatinneqaarpoq. Naapinneq ajornartorsiuteqarpoq, Aarhusimi Via University Collegemi prorektor, Peter Friese naapertorlugu.
Ingerlariaqqinnissamut aqqutissanik ujartuisariaqarpugut. Tamannami nammineerluni pinavianngilaq. Kikkummi tamarmik tamanna takusinnaavaat. Kalaallit danskillu imminnut ilikkarnerunissaannut allaallu pissusiinik ilikkarnerunisssaannut sinaakkusiisariaqarpugut, kiisalu peqatigiillutik suliaqarnissaminnut aamma sungiusarnissaannut.
AAMMA ATUARUK 'Grønlænderstiv' ordbogimi mianersoqqussutaassasoq
Jens Lennert Olsen, Sisimiuneersoq, danskit kulturianik naapitsinermi ajornakusoortitsisimasut ilagivaat. Taanna Danmarkimi ukiualuit matuma siorna efterskoleriarpoq, tamaanilu akerartortittarnikuulluni.
Ullumikkut Aarhusimi perorsaasunngorniarfimmi ilinniarfimmut aallartinnissaminut, piareersarluni ilinniarpoq. Tamaanilu maluginiarsimavaa, inimi atuartsitsiviusumi sunnertiaatsuusariaqarluni.
- Danmarkimiissagaanni akuerisaallunilu pikkoriffeqarlutit takutittariaqassavat. Tamanna piareersimaffigisariaqassavat.
AAMMA ATUARUK Kalaallit naleqqussarnissamik kissaateqarnikuupput
Peter Frieselu isumaqarpoq pissutsinik allannguinissamut piffissatsialaasoq, tassaasut inunnik sullissinissamut siunertaqarluni ilinniarfiit.
- VIA-mi ilinniarfiit qiviassagaanni - soorlu perorsaasut kalaaliaqqanik danskit paaqqinnittarfianniittunik sullissisussat; peqqissaasut napparsimmavinni kalaallinik naapitsisartussat; ilinniartitsisut kalaaliaqqanik atuartitsisussat angajoqqaavinullu suleqateqartussat (…) taava suliamik paasisaqarluartutut pissusilersorluta sullissisariaqassaagut: Qanoq ilillunga inissisimaffiinut naapigiarsinnaavakka, uattut ittuutilersiinnarnagit?
Isiginnaartitsissut kingornalu ataatsimiisitsineq Kalaallit Illuata Aarhusimiitup aaqqissuussarivaa, sammisaq ”Nukinga”-p ataanut inissillugu, tamannalu kalaallit kulturikkut kinaassutsikkullu nukitittussusiinik saqqummersitsiniarnerulluni.
AAMMA ATUARUK 'Ukiorpassuarni isertugaatigaara'
