'Grønlænderstiv' ordbogimi mianersoqqussutaassasoq

Det Danske Sprog- og Litteraturselskabip oqaatsit suut danskit oqaasiini akuerisani ilaalernissaat aalajangertarpaat, taamaalillutik danskit ordbogiini allassimalertarput. Sapaatip akunnerani matumani tallimanngorpat oqaatsit nutaat 1445-t danskit oqaasiisut pisortatigoortumik akuerisatut allassimalissapput.

Oqaatsit ilaat tassa grønlænderstiv oqaatsit immikkut isumaqartinneqartut ataaniissaaq. Imaanngilarli oqaatsit danskit ordbogiiniikkuni akornutaasumik atorneqassasut, aaqqissuisoqarfimmi pisortaq, Lars Trap-Jensen oqarpoq.

- Oqaatsit aalajangiiffigineq ajorpagut. Oqaatsit ordbogimi allaqqanerisa ajunngitsunngortinnagillu ajortunngortittanngilaat.

Oqaatsilli danskerpassuarnit ukiorpassuarni atorneqartarsimaneri atorneqartarnerilu ersersinneqartarput.

’Oqariartaaseq kalaallit danskiniit nalinginnaasumik imernerusarneranik paasineqartarpoq’.

- Oqaatsit Danmarkimi danskinit qanoq atorneqartarnera uagut nassuiartarpagut. Danskit oqaasiini isumamik pigiliutiinnakkanik ulikkaarpoq. Taamaammat oqaatsit nalunaarsornissaat uagut pisussaaffigaarput, Lars Trap-Jensen oqarpoq.

Taassuma oqaatsit nalunaarsorneqarlutillu pisortatigoortumik nassuiarneqarnissaat pingaartuusoraa.

- Oqaatsimik tusarnermi qanoq isumaqarneranik paasiniaavimmik qanorlu atorneqartarneranik nassuaavimmi takunnittoqarsinnaavoq, aaqqissuisoq oqarpoq.

AAMMA ATUARUK Kisitsisit siumut isummiuteriikkat pujaatsoortippaat

- Matumani oqaatsimik assersuusissaqarpoq, tassani oqariartaatsip nikassaarpaluttuunera allapparput, neriuppugut taama allannerput oqaatsimik akuinnginnissamut mianersoqqussutitut maluginiarneqarsinnaassasoq, Lars Trap-Jensen oqarpoq, taannalu isumaqarpoq oqariartaaseq taanna siusinnerusumit maanna atorneqannginnerusoq.

AAMMA ATUARUK Kalaallinut isummat pigiliutiinnakkat sorsullugit ataatsimeersuarneq

Det Danske Sprog- og Litteraturselskabip oqaatsit immikkoortunut isumaliutiinnakkanut assingusunut ikkusimanissaat isumagisanngilaa. Selskabilli sulisuisa oqaatsit ordbogini qanoq nassuiarneqarnissaat isumagisarpaat.

- Soorunami inuit kinaassusaanut tunngatillugu oqaatsinik allaniit mamianarnerusartunik oqaaseqarpoq. Oqaatsit taakku ilaat inuit ilaannut narrunarsaatitut paasineqarsinnaanerat oqaluttuariniarsarisarpagut.