Kalaallinut isummat pigiliutiinnakkat sorsullugit ataatsimeersuarneq

Piniartoq imerajuttorluunniit? Tassa isummat pigiliutiinnakkat kalaallit Danmarkimut nuunnerit aqqusaartagaasa ilaat. Taamaammat isummat pigiliutiinnakkat sorsullugit Aalborgimi ataatsimeersuartoqassaaq.

Karolina Jensen Aalborg Kommunep kalaallinut sullissiviani siunnersortaavoq, ataatsimiinnissamilu aaqqissuuseqataassimalluni. Taassuma ajornartorsiutit kalaallit ulluinnarni naapittagaat nalunngisaqarfigai.

- Kalaaliunertik peqqutigalugu suliffittaarnissartik initaarnissartillu ajornakusoortittarpaat. Inissarsiuullugit ajornartorsiornarpoq, paasigaangamikku kalaallimik sullissaqartugut itigartitsisarpaatigut, Karolina Jensen oqarpoq.

Ataqqinninneruneq anguniarneqassaaq

Taamaattumik kalaallinut Danmarkimiittunut ataqqinninnerulernissaq anguniarlugu ullumi aggustip 23-ani Aalborg Kommune ataatsimeersuartitsissaaq. Danmarkimi Kalaallit Nunaat kalaallillu pillugit qanoq naleqquttumik assilianngortitsisinnaanissaq sulisut, politikkerit piumasullu eqqartussaavaat. 

- Kalaallit Nunaat illuikkanik, nannunit juullip inuanilluinnaanngitsoq takutikkusupparput. Qallunaat Kalaallit Nunaannik ilisimasaat sammissavagut, Karolina Jensen ataatsimeersuarnissaq pillugu taama oqarpoq.

Isummat pigiliutiinnakkat misillerfigisimavai

Sanne Hansen kalaallit Danmarkimiittut 18.000-it missaanniittut ilagivaat, taassuma Lyngbymi Danmarkimi teknik pillugu ilisimatusarfissuarmi DTU-mi issittumi atortorissaaruserineq ilinniarpaa. 

Taassuma isummat pigiulitiinnakkat misillerfigisimavai.

- Atuarninni malunnartarami, soorlu ilinniartitsisut kalaaliusunga paasigaangamikku suliassakka ikilisittarpaat, eqqarsarlutik  naammassisinnaanavianngikkikka.

Taannalu kalaallinik pigiliutiiinnakkanik isummmersimasunut oqariartuutissaqarpoq:

- Kalaaliugama imaanngilaq sianiinnerusunga, ilissitulli pikkoritsigivunga. Suminngaanneerfigut assigiinngiinnarput.

Oqariartuut siammarterneqassaaq

Oqariartuut taanna siammartikkusullugu kalaallit Danmarkimut nuunnerit ingerlalluartut isiginiarneqarnerunissaat ataatsimeersuarnissap siunertaraa.

- Ataatsimut isigalugu Kalaallit Nunaat pillugu ilisimasaqarnerorusuppugut Kalaallit Nunaallu nalitsinnut naleqquttoq takutikkusullugu. Kalaallit ingerlalluartut isiginiarneroqquagut, Karolina Jensen taama oqarpoq. 


Kultureqarnermut ministeri Mette Bock folketingimilu ilaasortaq Aaja Chemnitz Larsen qaaqqusanut ilaapput. Aalborg Kommuneata ataatsimersuarnissamut aaqqissuussisuuvoq Trekanten Kulturhus, Kofoeds Skole, Kalaallit Illuutaat Aalborgimiittoq aammalu Foreningen Grønlandske Børn peqatigalugit. 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat