Danmark nunatta kujataani aatsitassarsiornermut 39 millionit koruuninik atukkiisoq
Tuluit aatsitassarsiutileqatigiiffiannit pigineqartumut, Amitsumi grafitimik piiaaffissamut 39 millionit koruuningajaat (5,2 millionit euro) aningaasaliissutigineqalerput.
Aningaasaateqarfik, Danmarks Eksport- og Investeringsfond, Eifo, aningaasanik atortitsilluni tusagassiuutinut nalunaarummi paasissutissiivoq.
GreenRoc grafitimik batteriinik nioqqutissiornermut ilaatigut atorneqartartunik piiaaffimmik ammaanissamik anguniagaqarpoq. Nato-lli grafit illersornissamut atortorissaarutinut atorneqarsinnaammat aatsitassatut pisariaqartutut aamma taanikuuaa.
Aatsitassarsiutileqatigiffiup piiaaffissami grafiti ikinnerpaamik ukiuni 20-ni piiarneqarsinnaasoq missiliorpaa.
Danmarkimit taarsigassarsiat saffiugassanik piiaanissamut, qillerinissamut aatsitassarsiorfiullu ineriartortinneranut sulianut naleqquttunut atorneqassasut, Eifo paasissutissiivoq.
Pilersaarusiornermi suleqatigiinneq
EU-p 41 milliardit koruunit pilersaarusiornermi pingaaruteqartutut isigisaminut, aatsitassarsiornermi suliniutinut assigiinngitsunut 13-inut agguataarsimasunut – matumani Nanortallip avannaani GreenRocimut immikkoortitsivoq.
Eifo-mi pisortaanerup, Peder Lundquistip nunatta kujataani aatsitassarsiorfik aamma pingaaruteqarnerarpaa.
- Kalaallit Nunaat Eifomut pilersaarusiornermi pingaaruteqarpoq. Kalaallit Nunaata aningaasaqarnerata ineriartortinneqarnissaanut tapersersuinissamut, pitsanngorsaanissamut kiisalu aatsitassanik pingaarutilinnik pilersuinerup patajaallisarnissaanut suliniarpugut.
Eifollu nunatsinni suliaqarnini annertusarniaraa ilanngullugu oqaatigaa. Tusagassiuutinut nalunaarut naapertorlugu Eifo nunatsinni suliaqarfinni assigiinngitsuni suliffeqarfinnut 25-nut agguataarsimasunut ullumikkut 390 millionit koruuniuteqarpoq. Aningaasat taakku atukkiussanik, qularnaveeqqutinik aningaasaliinernillu ilaqarput.
Minik Rosingip sermimit marrak pillugu suliniutaa, Rock Flour Company qaammatip siuliani 45,5 millionit koruuninik aningaasaliiffigineqartoq, nunatsinni aningaasaliinerit ilagaat.
Akuersissuteqarneq
Issittumi aatsitassarsiorfimmik ammaaneq ajornaatsuinnaanngilaq. Taamaammat aningaasaliinerpassuit pisariaqarput.
Aatsitassarsiornerup aallartissinnaanissaanut piffissap sivikitsup ingerlanerinnaani iluanaaruteqalernissamut naatsorsuuteqanngitsunik aningaasaleerusuttoqarnissaa pisariaqarpoq.
Taamaammat GreenRocsip siulersuisuisa siulittaasuata, Georg Frangeskidesip Danmarkimit atorneq nutaaq aatsitassarsiorfiup pitsaassusaanik akuersissuteqarnertut isigaa.
- Amitsumi suliniutitta pitsaalluinnartuuneranik akuersaarneqarneratut Europalu suliarinniffimmik tamakkiisumik pilersitserusunnitsinnut akuersinertut aamma isigaarput, Georg Frangeskides oqarpoq.
Eifop pilersaarutit tamarmik ajunngitsumik ingerlassappata aningaasaliinikkut suleqatit aningaasaliisullu allat peqatigalugit GreenRocimut tapersiinissaq suli soqutigalugu paasissutissiissutigaa.
