Inunnut innarluutilinnut atugassarititaasut pitsanngorsartuarlugillu ineriartortinneqassasut. Tusilartunut atuarfiup 2008-imi matuneraniit pissutsit arriitsumik ajorsiartuinnaavissimasut, Tilioq isumaqarpoq.Assi: Scanpix

Tusilartut nutserisussaqanngillat

Oqartussat tusilartut nutserisoqartinneqarnissaat pisussaaffigaat, kisianni akisussaaffimmik tigusisoqanngitsoq inuit innarluutillit illersuisuat isumaqarpoq.

Inuit innarluutillit tapersersorneqarnissaannut inatsit januaarimi atuutilersoq pillugu, Tilioq ungasinngitsukkut pisortanut isornartorsiuteqarpoq, inatsillu malinneqanngitsoq oqariartuutigalugu.

Maanna Kalaallit Nunaanni tusilartut ikiorneqarnissaminnik amigaateqarlugit tiliumut saaffiginnissuteqarput.

- Kalaallit Nunaanni ussersorlutik nutserisinnaasut amingaataasorujussuupput, Sisimiuni ussersorluni oqaasilik Lulu Reimer Geisler oqarpoq.

AAMMA ATUARUK Kalaallit tusilartut qallunaanut akuliusimanngillat

Naalakkersuisut Kalaallit Nunaanni inuit annertuumik innarluutillit pillugit naatsorsueqqissaarnerat 2017-imeersoq naapertorlugu, nunarput tusilartunik 38-inik innuttaasoqarpoq.

Tilioq inunnik sullissisumit saaffigineqarpoq, tusilartut inuiaqatigiinni peqataatinneqannginnerat oqariartuutigalugu.

- Allaanerusutut isigineqarlutik pissusilersorfigineqartarput, soorlu suliffeqarnermi peqataajuminaatitsisarput. Uffa massa tusilartut allarpassuarnik piginnaasaqaraluartut kisianni tusaasaqarsinnaanngiinnarlutik. Inunnik sullissisoq nangilluni oqarpoq, tusilartut kommunimit tapersersorneqaratillu ikiorneqartanngitsut, tassa ussersorlutik oqaloqatigiissinnaasannginnamik nutserisoqartaratillu. Mobilimi sulianik ingerlatsisumut allaqattaartarput imaluunnit pappiaqqamut allattuillutik.

Pissutsit ajorseriartut

Tilioq Namminersorlutik Oqartussanut aamma Pitsaaliunermut Isumaginninnermullu Aqutsisoqarfimmut Kalaallit Nunaanni tusilartunut ussersorluni nutserisinnaasumik periarfissanik ujartuilluni maajimi 2020-mi saaffiginnissuteqarpoq. 

- Assersuutigalugu peqqinnisaqarfimmi ussersorluni nutserisup pissarsiarinissaanut kiisalu akissarsisinneqarnissaanut pisussaaffeqarpoq, soorlu tusilartup uninngarata naalaani. Tamannalu inuit innarluutillit tapersersorneqarnissaannut inatsimmut ilitsersuummi erseqqilluinnartumik allassimavoq. Aamma atuarfeqarfimmi tusilartunut tutsarluttunullu ussersorluni nutserisoqartarnissaanut pisussaaffeqarneq atuarneqarsinnaavoq, inuit innarluutillit illersuisuat Christina Johnsen oqarpoq.

Kalaallit Nunaata Naalagaaffiit Peqatigiit isumaqatigiissutaat atuutilersinnikuaat, tamannalu tunngaviusumik allannguisoqarnissaanik, pisinnaatitaaffinnillu tamakkiisumik malinnikkumanermik ineriartortitsiumanermillu qulakkeerisussaavoq.

Tassa inunnut innarluutilinnut atugassarititaasut pitsanngorsartuarlugillu ineriartortinneqassasut. Tusilartunut atuarfiup 2008-imi matuneraniit pissutsit arriitsumik ajorsiartuinnaavissimasut, Tilioq isumaqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat