Kalaallit tusilartut qallunaanut akuliusimanngillat
![](/sites/default/files/styles/image_934x467/public/article_images/hearingaid.jpg?itok=eBuKo-p6)
Kalaallit tusilartut amerlanerpaat Danmarkimi najugaqartut, tusilartut peqatigiiffiiniit imaluunniit tusilartut kattuffianniit neqeroorutigineqartartut atorneq ajorpaat. Tamaattumik tusilartut avatangiisiminnut matoqqasunngortarput inuaqatigiinnullu akuliusimassanatik. Danmarkimi tusilartut kattuffianni, Danske Døves Landsforbundimi, allattoqarfimmi pisortaq, Helle Skjoldan oqarpoq.
-Ilimagaarput kalaallit tusilartut Danmarkimiittut pitsaavallaanngitsumik ingerlasut aammalu maani inuiaqatigiinnut akuliusimanngitsut, Helle Skjoldan oqarpoq.
Helle Skjoldan isumaqarpoq, kalaallit tusilartut Qallunaat Nunaanni pissutsinut ilisimasaqarnerat killeqartartoq – tamannalu ulluinnarni ajornartorsiutinngortartoq.
-Ajornartorsiutit ilagisarpaat qallunaatut oqaatsit amerlanerit ilisimarpiarneq ajormatigit aammami ussersuutit atorneqartut atortagaannit allaanerullutik. Taaguutit assigiinngitsorpassuit allaanerupput. Tusilartut peqatigiiffiinni annertuumik ataqatigiittoqarpoq – tamakkunanili kalaallit akuttusoorujussuarnik takusarpagut, Helle Skjoldan oqarpoq.
Kalaallit tusilartut matoqqasunngoraangata ulluinnarni inuunerannut pitsaanngitsumik sunniuteqartartoq, Helle Skjoldan oqarpoq. -Taakkununnga ima kinguneqartarpoq pilluarneq minnerulertarluni. Kissaatigaarput Kalaallit Nunaata aamma Danmarkip qaninnerusumik atassuteqarfigeqatigiinnerunissaat – ilaatigut kalaallit tusilartut maanga nassiunneqartarnerat pillugu. Ilinniartariaqarparput inuit taakku qanoq iliorluta allaanerusmik sullissinnaanerlutigit, Helle Skjoldan oqarpoq.