Tusagassiuutit: Politiit Jens Napaattuumut tunngatillugu suliaq unitsippaat

Jens Napaattooq nakuuserneq siorasaarinerluunniit pillugit eqqartuunneqassanngilaq.

Jens Napaattuup videoliami inooqatiminut siorasaarinera tunngavigalugu Siumumit politiinut unnerluutigineqaraluarpoq.

Videoliarmi Jens Napaattuup inooqataata meeqqallu angerlarsimaffianni pisoqarnerani immiussaq Facebookikkut apriilimi siammarterneqarpoq.

Videoliami inuit pingasut inimiittut takutinneqarpoq. Taakkunannga marluk tassaapput Jens Napaattooq taassumalu inooqataa. Napaattuup inooqataa natermi nalavoq. Meerarlu pisumik immiussisuulluni.

AAMMA ATUARUK Siumup Jens Napaattooq politiinut unnerluutigigaa

Inatsisartuni ilaasortartaat ataatsimeerngaanngitsiartullu video taanna inuit attaveqaqatigiittarfianni weekendiugaa ingerlaartinneqarpoq. Aningaasaqarnermut Akileraartarnermullu ataatsimiititaliami pingaarutilimmik inissisimasumi, Jens NapãtôK´ siulittaasunngortinniarneqarpoq, tamannalu peqqutaalluni illuatungiliuttut Inatsisartut ataatsimiittarfianit akerliussutsimik takutitsillutik aniinarput.

Siumup Jens Napaattooq politiinut unnerluutigigaa.

Jens Napaattooq suliaq pissutigalugu Inatsisartunit Avannaata Kommunianilu kommunalbestyrelsinit sulinngiffeqarpoq.

Naleqqamit politikeri inooqataalu tamatuma kingorna Allorfimmi katsorsartipput.

Politiillu suliaq maanna unitsippaat. Unnerluussisussaatitaasut aviisimut AG-mut oqarput.

- Pissutaasut tassaapput oqaatigineqartut imarisaat, tamatumani oqaatigineqartut oqaatigineqarsimallutik “siorasaasinerusinnaasutut”, kisianni aamma sioorasaarutigineqartup pinerluttulerinermi inatsimmik unioqqutitsinerunnginneranik, Kalaallit Nunaanni Politiini unnerluussisussaatitaasuni unnerluussisoq, Anne Kathrine Clinton AG-mut oqarpoq.

AAMMA ATUARUK Jens Napãtôk ataatsimiititaliani pissaaneqarfiusuni siulittaasunngoqqippoq

Jens Napaattuup politiit suliamik unitsitsinissaat ilimagereersimallugu aviisimut oqaatigaa:

- Tamanna tupaallaatiginngilara. Taamatut inerneqarnissaa ilisimajuaannarsimavara.

Naleqqamit politikeri marlunnik qinigaaffeqarpoq. Taannami Inatsisartunut aamma Avannaata Kommuniani kommunalbestyrelsinut qinigaanikuuvoq. Jens Napaattooq suliffeqareerluni uteqqinnikuuvoq.