Tusagassiuut: Brobergip nunanut allanut tunngasut akisussaaffigiunnaassavai
Nunanut allanut tunngasunut nutaamik naalakkersuisoqalissaaq. Sermitsiaq.ag "paasisaqarfiit tutsuiginartut" oqaasii tunngavigalugit sapaammi taama allappoq.
Tassalu paasissutissat pisortatigoortumik suli uppernarsarneqanngillat.
Pele Broberg nunanut allanut tunngasunut naalakkersuisuujunnaassasoq, kisianni inuussutissarsiornermut, niuernermut silallu pissusianut naalakkersuisuuginnassasoq nittartagaq allappoq.
Sermitsiaq.ag-p paasissutissaatai naapertorlugit tallimanngormat taama aalajangertoqarpoq.
AAMMA ATUARUK Ukiakkut ataatsimiinneq aallartippoq: Broberg ammaanersiornermi oqalugiaammi eqqaaneqanngitsoq
Tassalu Pele Brobergip inuiannit Inunnit kingoqqisuusut kisimik nunatta namminiilivinnissaanut siunissami taasititsinissami taasisinnaasariaqarnermik danskit aviisiannut Berlingskemut sapaatit akunnerata siuliani oqarnera kinguneqartussanngorpasippoq.
Brobergip oqaasii Naalakkersuisut politikkerinngikkaat Naalakkersuisut siulittaasuat, Múte B. Egede naqqiuteqarluni sapaatiummat allappoq.
Partii naalakkersuisoqatigiinnut ikorfartortaasoq, Atassut, Broberg tatigiunnaarlugu Naalakkersuisunullu ilaasortani nikititsisoqartariqarsoralugu kingorna nalunaarpoq.
Nikititsisoqartussanngorpasittoq
Múte B. Egede Brobergip oqaasii Naalakkersuisunut sunniuteqassanersut pillugu aatsaat sapaatit akunnerisa tulliani oqaaseqarniarluni tallimanngormat oqarpoq.
- Aatsaannguarlu oqalugiarnini ilimasaarivunga, sapaatip akunnerata tulliata aallartinnerani Inatsisartut siulittaasoqarfiannut massakkut qinnuteqarlunga, Naalakkersuisut katitigaanerannut tunngasunik, aaqqissuusseqqinnissamik, aammalu meeqqanut inuusuttunullu naalakkersuisussamik ikkussinissamut siunertaqartumik qinnuteqaateqarsimallunga, Múte B. Egede tallimanngormat oqarpoq.
Naalakkersuisunik qinersineq Inatsisartut ukiakkut ataatsimiinneranni sapaatiummat oqaluuserisassanngortinneqarpoq. Taannalu Inatsisartut aqagu ataasinngornermi oqaluuserissavaat.
Sermitsiaq.AG-p allaaserisaa KNR-ip uppernarsartinniarsarigaluarpaa. Oqaloqatiginiakkagulli ilaat attavigisinnaasimanngilagut, attavigisagullu oqaaseqarusunnatik.