Tunumi Qaanaamilu aalisartut pitsaanerusumik tapiiffigineqarsinnaalertut

Aalisartut aalisariutillillu Tunumi Qaanaamilu najugallit tapiissutinik pissarsisalernissaat siunissami ajornannginnerulissaaq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik tusagassiuutinut nalunaarummi allappoq.

Aalisariutit 6 miiterinit 9,5 miiterinut takissusillit aaqqiissut nutaaq malillugu 85 procenti tikillugu taperneqartalissapput 9,5 miiterimiillu takinerit 60 procentimik taperneqartalissallutik.

Aamma nammineq aningaasaliissutissat 2 procentimut 5 procentimullu ikilisinneqarput.

- Sumiiffinni isumannaatsumik aalisarsinnaanissaq nutaamik tapiissuteqartitsisalernissami tunngavigineqartut ilagaat. Tunumi aalisartut ukioq kaajallallugu aalisarsinnaanissannut periarfissaqarnerulissalluni. Sumiiffinni aalisariutit piginnaasaasa nutarteriffigineqarnissaannut aamma periarfissaqalissalluni, tusagassiuutinut nalunaarummi allaqqavoq.

Naalakkersuisut naatsorsuutigaat tapiissutit tunngavigalugit aalisartut isertitaqarnerulissasut sumiiffinnullu pitsaasumik kinguneqartitsisoqassalluni. 

Tunumi illoqarfinni nunaqarfinnilu innuttaasut, aalisarnermut ataatsimiititaliamit siorna tikeraarneqarput. Aalisarnissamut periarfissagissaartoqartoq aningaasatigulli tapiissuteqartoqarnissaanik aningaaserivimmiillu taarsigassarsisinnaanerunissaq amigaatigineqartut tikeraarnermi oqaatigineqarpoq.

Nannunik arfernillu pisassiissutit amerlineqarnissaat aamma pisariaqartoq aamma eqqaavaat, pisassiissutigineqartulli suli tamakkerneqanngillat.