Inatsisartut sakkut pillugit inatsit nutaaq ukiunik killissarititalerlugu akuersissutigigaat
Kalaallit Nunaanni inatsisartut sakkut pillugit inatsit, sakkunik atuinissamut ukiut killissaritinneqartussat 15-iulersillugit, pingasunngormat allanngortippaat.
Tamanna Sermitsiami allaaserineqarpoq.
Tamanna sakkut pillugit inatsimmik 1992-imili allannguutaanerpaavoq, tusagassiuut allappoq.
15-inik ukioqalereersimasut kisimik aallaaseqarsinnaalernerat atuisinnaaneratalu saniatigut ingiaqateqartarnissaat pillugu aaqqissuussineq atulersinneqarpoq.
Taamaalillutik meeqqat aqqaneq-marluk 15-inillu akornanni ukiullit, sunngiffimmi piniarnermut allagartaqaraluarunik, inersimasortaqarlutik suli piniaqataasinnaapput.
Aammattaaq sakkut pillugit inatsit nutaaq naapertorlugu, sakkut imassallu immikkoortiterneqartussaapput.
Inatsisartuni amerlanerussuteqartut sakkut pillugit inatsimmik nutarterineq akuersissutigaat, inatsisissatulli siunnersuut Folketingimi suliarineqareerpat akuersissutigineqareerpallu aatsaat atuutilissaaq. Nunatsinni oqartussaaffigineqannginnera tamatumani pissutaavoq.
Kalaallit Nunaanni partiit naalakkersuisoqatigiit pingasut, Demokraatit, Inuit Ataqatigiit (IA) aamma Atassut akuersissuteqarput, Naleraq Siumullu taasinnaanngillat.
Piffissami sivisuumi piviusunngortinniarneqartoq
Sermitsiap allaaserisaa naapertorlugu sakkut pillugit inatsimmik nutarterineq sivisuumik piviusunngortinniarneqarpoq ukiorpassuarnilu oqallisigineqarluni. Danmarkimi inatsisinik atortitsinermut ministereqarfik aamma Kalaallit Nunaanni naalakkersuisut, sakkut pillugit inatsit nutaaq pillugu 2018-imi siullermeerlutik ataatsimiissutigivaat.
Inatsisissatut siunnersuut naapertorlugu Kalaallit Nunaanni Politiit sakkut pillugit inatsisip nutarterneqarnissaa kissaatigaat.
Tamanna "alianartunik arlalinnik pisoqartarneranik“ pissuteqarpoq, ilaatigut aallaammik aallartoortoqartarneratigut, toqutseriartoqartarneratigut imminullu toquttoqartarneratigut.
Partiit arlallit sakkut pillugit inatsit nutaaq, siunertarineqanngitsumik ileqqutoqqanut "meeqqat ilaquttatik ilagalugit piniariarlutik peroriartornerannut" sunniuteqarnissaa ernummatigaat.
- Meeqqat ilai arfinilinnik ukioqalereernerminni perngartarput, inatsisissatut siunnersuut pillugu isumaliutissiissummi apriilip 30-anni saqqummersumi allassimavoq.
Tamanna aalisarnermut, piniarnermut, nunalerinermut imminullu pilersornermut naalakkersuisup Peter Borgip Demokraatineersup maluginiarpaa.
Taanna Sermitsiap nutaarsiassiinera naapertorlugu, inatsisissatut siunnersuutip pingasunngormat suliarineqarnerani oqarpoq, inatsit nutaaq "piorsarsimassusitsinnut ileqqutsinnullu meeqqagut perngarniarniarnissaannut naapertuuttunngortinniarlugu“, qanoq naleqqussarneqarsinnaanersoq misissorniarlugu.
Danmarkimi 16-ileereeraanni piniarnermut allagartartaartoqarsinnaavoq. Assersuutigalugu aallaammik piniarnermut atugassamik pisissagaanni pigisaqarusukkaannilu, politiinut sakkunik tigumminissamut akuersissummik qinnuteqarsinnaanissamut 18-ileereersimanissaq piumasaqaataavoq.
