Ulloq unnuarlu angerlarsimaffik: Meeqqat inuusuttullu angerlareernerminni ulloq unnuarlu angerlarsimaffinnut uteqqittartut suli amerlapput
Meeqqat inuusuttullu angerlareernerminni ulloq unnuarlu angerlarsimaffinnut uteqqittartut suli takussaapput, meeqqamullu sunniutai sakkortusinnaapput. Tamanna meeqqanut inuusuttunullu ulloq unnuarlu angerlarsimaffiup Mælkebøttencenterip KNR-imut allakkatigut saqqummiuppaa.
Ulloq unnuarlu angerlarsimaffinnut uteqqinneq meeqqamut misigissutsikkut ineriartorneranullu artukkiisartoq Nuka Fleischerip oqaatigaa.
Allattoq Jonna Enoksen Dahl
maajip 16-at 2026 09:00
Meeqqat Inuusuttullu angerlarsimaffimminnut uteqqittartut amerliartorneri pillugit KNR-ip sapaatip akunnerani kingullermi allaaseraa. Ulloq unnuarlu angerlarsimaffiilli paasissutissiineri naapertorlugit angerlartartut amerlasuut ulloq unnuarlu angerlarsimaffinnut suli uteqqittarput.
Meeqqat 24-t ataallugit ukiullit angerlartut 2025-mi 92-iusut, ukiuni siuliini tallimani agguaqatigiissillugu ukiumut 66-iusartut, Kommuneqarfik Sermersuup Meeqqanut Ilaqutariinnullu ingerlatsiviup kisitsisit pingaarnerit pillugit nalunaarusiaani tamanna atuarneqarsinnaavoq.
Mælkebøttencenteri meeqqanut inuusuttunullu ulloq unnuarlu angerlarsimaffinnik sisamanik immikkoortortaqartoq, meeqqanik inuusuttunillu ukioqanngitsuniit 23-nut ukiulinnut immikkut isumagineqarnissamik pisariaqartitsisunik katsorsaanermillu neqeroortarpoq.
Meeqqat inuusuttullu angerlarsimaffiup avataanut inissinneqareerlutik ilaquttaminnut angerlartut amerliartoraluartut, taakkua ilaat ulloq unnuarlu angerlarsimaffinnut suli uteqqittartut amerlasuujusut Mælkebøttencenterimi pisortap Nuka Fleischerip oqaatigaa.
Tamanna Mælkebøttenimiit sapaatit akunneri marluk matuma siuliani nalaanneqarpoq.
- Anaanaasoq meeqqap toqqissisimasumik pissusilernissaanut, killissaminik qaangiinnginnissaanut isumassuinissamillu pisariaqartitaanik tunniussisinnaanngilaq, meeqqallu pissusilersuutai assut ernumanarsipput. Taama pisoqartillugu meeqqap ajornartorsiutai angerlartinneqannginneraniit ingasannerulersimasartut takusarpugut, Nuka Fleischer KNR-imut allalluni nassuiaavoq.
Meeraq salliunneqassaaq
Ulloq unnuarlu angerlarsimaffinnut uteqqinneq meeqqamut misigissutsikkut ineriartorneranullu artukkiisartoq Nuka Fleischerip aamma oqaatigaa.
-Taama pisoqartillugu takuneqarsinnaavoq meeqqap avatangiisiminut tatiginninnermi ilaa annaasimagaa, tamannalu akuusut tamarmik sullissiniarnerannut ajornakusoornerulersitsisarpoq. Siusinnerusukkut iliuuseqarneq iluaqutaasimasinnaagaluarpoq.
Mælkebøttencenterip Kommuneqarfik Sermersuup meeqqanik angerlartitseqqiilluni suliniutaa tapersersoraluarlugu angerlartitsinerit aningaasatigut politikkikkulluunniit tunngaveqannginnissaat, meeqqalli isumannaatsuunissaa pisariaqartitaasalu salliutinneqarnissaat kissaatigaa.
Meeqqanik angerlarsimaffiup avataanut inissiisarnermi kommunip allaffiani aamma ulloq unnuarlu angerlarsimaffinni sullissisussanik amigaateqarneq aamma ajornartorsiutaavoq.
- Sulisut aalaakkaasuunnginnerisa malitsigisarpaa pilersaarusiorsinnaannginneq, suliat pillugit malitseqartitsiniarneq nalilersuisinnaannginnerlu. Tassalu apeqqutaalerpoq, meeqqat pineqartut atugassanut qanoq ittunut angerlartinneqarsimanersut. Meeqqat pineqartut suut tunngavigalugit angerlartinneqartarneri matumani apeqqutaalerpoq, meeqqap pisariaqartitai qanorlu innera ilisimaqqissaarlugit angerlartitsisoqartarsimanersoq, Nuka Fleischer allalluni nassuiaavoq.
