Kommuneqarfik Sermersooq: Meeqqat inuusuttullu angerlarsimaffiup avataanut inissinneqarsimareerlutik ilaquttaminnut angerlartut amerliartorput
Nuummi, Ittoqqortoormiuni, Paamiuni Tasiilamilu meeqqat angerlarsimaffiup avataanut inissinneqartartut 2021-mit massakkumut aatsaat taama ikitsigipput.
Meeqqat inuusuttullu 24-t ataallugit ukiullit angerlarsimaffiup avataanut inissinneqartartut 2024-mit 2025-mut 387-init 329-nut ikileriarput.
Angerlarsimaffiup avataanut inissinneqareerlutik ilaquttaminnut angerlartut aamma aatsaat taama amerlatigipput. Angerlartummi 2025-mi 92-iupput, ukiuni siuliini tallimani agguaqatigiissillugu ukiumut 66-iusarput.
Kommuneqarfik Sermersuup Meeqqanut Ilaqutariinnullu ingerlatsiviup kisitsisit pingaarnerit pillugit nalunaarusiaa taama paasissutissiivoq.
Suliniutit assigiinngitsut
Tamaanga killinnissaq anguniarlugu isumaginninnikkut perorsaanikkullu ikiortit peqatigalugit meeqqat toqqissisimasumik angerlarteqqinnissaannut uppernarsaatinik ujarlernerit, Meeqqanut Ilaqutariinnullu ingerlatsiviup aallussimagaa, ingerlatsivimmi pisortap Frederik Lundbladip oqaatigaa.
Aamma ilaqutariit meeqqaminnik najorneqaleqqinnissaat anguniarlugu namminneq angerlarsimaffeqalernissaat kommunip sulissutigisaraa, tamannalu iluatsilluarsimasoq, taanna oqaluttuarpoq.
-Angerlartinnginnerani piareersaanerit angerlartinneratalu nalaani ikiuinerit kingusinnerusukkullu aamma qulakkeerinninnerit annertuumik sammisimavagut, taamaaliornitsigut angajoqqaaminnut utertut ukioq 2025-mi annertuumik angusimallutigit.
Kommuneqarfik Sermersuumi meeqqat inuusuttullu ilaquttaminnut angerlaqqittut amerliartorneri aamma angerlarsimaffiup avataanut inissiisarnerit ikiliartormata Meeqqanut Ilaqutariinnullu ingerlatsivimmi sulineq ajornannginnerulersimavoq.
-Ataatsimut aamma eqqarsaatigalugu ajornaallisaanerit aaqqissuussaanermi sulisunut soorunami minnerunngitsumik aamma sullitatsinnut sulinermi ajornaallisaaneq aqqutigingaatsiarlugu tassani apeqqusersortarsimavarput ingerlatsinerput, sooruna taamatut ingerlatsisugut ajornannginnerusumik iliorsinnaavugut? Taakkua aamma suliaringaatsiarsimavagut taamaalilluta sullissinerput pitsanngortinnissaa eqqarsaatigalugu.
Suli suliassaqartoq
Suliniutit siorna aatsaat aallartikkaluartut, suli suliassaqarpoq.
-Ukioq 2025-imi alloriarneq siulliuvoq, taavalu una meeqqanut ilaqutariinnullu politikki ukiuni qulini atuuttussatut aaliangiunneqarnikuulluni, taamaattumik ataatsimut isigalugu ikiorsiissutit ilaqutariinnut annertusarnissaat tassani pingaaruteqarpoq.
Nangipporlu:
-Siusinaartumik iliuuseqarnissaq annertusarneqarnissaa tassani eqqarsaataavoq. Taamaattumik neriuppugut siunissami ukiuni tulliuttuni aamma taakkua annertusarneri piviusunngortissinnaassallutigit, Frederik Lundblad oqarpoq.
Angerlarsimaffiup avataanut inissiinermut kiisalu ilaqutarsiaqartitsinermut atatillugu aningaasartuutit 2025-mi qaammammut agguaqatigiissillugu 23,4 millionit koruunit atorneqarput.
2024-mi suliassaqarfimmut tamatumunnga qaammammut agguaqatigiissillugu 26,5 milliuunit koruuniupput.
