Dronning Margrethep uummataa noqartarmat napparsimmavimmut unitsinneqartoq
Dronning Margrethep uummataa noqartarmat Rigshospitalimut maajip 14-ianni unitsinneqarpoq, uummataatalu taqaa neruttorneqarluni.
Kunngikkormiut tusagassiorfinnut taama nalunaaruteqarput.
Dronningi ajunngilaq, napparsimmavimmili akunnerup naanera tamaat uninngagallassaaq nakkutigineqarlunilu misissorneqassalluni. Kunngikkormiut taama nalunaaruteqarput.
Suliaritinneq nalinginnaasoq
Taqaq milikarsimappat uummatip taqaasa ilaat neruttorsarneqartarpoq.
Uummatip taqaat milikarsimappata uummat noqartalersinnaavoq. Nittartagaq Sundhed.dk taama allappoq.
Taama suliaritinneq nalinginnaasuuvoq, ernumanartoqaranilu. Ilisimatusarnermi Hjerteforeningenimi qullersaq Gunnar Gislason nutaarsiassaqartitsivimmut Ritzauimut taama oqarpoq.
Uummat pingaartumik utoqqaliartornermi noqartalersinnaavoq, uummatikkullu nappaatit nalinginnaasut ilaanniilluni. Gunnar Gislason TV 2-mut aamma taama oqarpoq.
Uummat noqartoortaleraangat misissuisoqartarpoq, isumannarunnaarnissaatalu tungaanut taama misissuisoqartarluni. Taamatut misissugaritinnerup kingorna ullut marluk pingasulluunniit qaangiunnerani angerlartoqarsinnaasarpoq.
Arnaq susassaqartuaannartoq
Anigorsinnaanngisaminilli nappaateqarpoq, uummataalu suli noqartalersinnaalluni. Hjerteforeningenimi Ilisimatusarnermi qullersaq Ritzauimut taama oqarpoq.
Dronning Margrethe 86-inik ukiulik Rigshospitalimut aatsaat unitsinneqalinngilaq.
Nuannini pillugu siorna aamma unitsinneqarpoq, soorlu aamma Fredensborg Slotimi 2024-mi uppinnermi kingorna unitsinneqartoq, qitimigullu 2023-mi suliaritikkami aamma unitsinneqartoq.
Naak arlaleriarluni unitsinneqareeraluartoq dronningi susassaqartuaannartoq Danmarks Radio allappoq.
Dronning Margrethe tamanut kingullermik takuneqarami Hellerupimi Sankt Lukas Stiftelsenimut maajip arfernanni pulaarpoq. Kunngikkormiut ullorsiutaanni tamanna takuneqarsinnaavoq.
Sverigep kunngia Carl Gustaf maajip aallartisimalaarnerani 80-iliimmat dronning aamma peqataavoq.
Dronningi apriilip 16-ianni aamma 86-iliivoq, Fredensborg Slotimi taamanikkut nalliuttorsiutigineqarluni.
Børsenip sanaqqinneqarnera paasiniaaviginiarlugu Børsenip Københavnimi illutaanut taassuma siuliani aamma pulaarpoq.
