Norgemut unamminerup kingorna - Tulluusimaarpugut
![](/sites/default/files/styles/image_934x467/public/2023-11/20231130-072355-L-1920x1279we.jpg?h=e13b9a12&itok=unT_AxYn)
Kalaallit assamik arsarnermi nunanut allanut unammisartut nunarsuarmi pissartanngorniunnerat pingasunngornermi aallartippoq.
Unamminerminni pissartanngornissamut piukkunnarnerpaat aamma Stavangerimi nunaminni unammisut unammivaat:
- Nunarsuarmi pisartaasimasunut unammilluni pissanganavippoq, Ivalu Bjerge Norgemut unammeriitsiarnerminni oqarpoq.
Taannalu unammillutik ajorsarujussuaraluarlutik qungujulasuni kisiartaanngilaq:
- Taama sakkortutigisumik unammilluni pissanganaqaaq. Nunarsuarmimi pissartaapput. Tatineqangaarneq, oqilasuut isertitseriallaqqissullu. Inuussutissarsiutigisatut ullut tamaasa sungiusartartuupput. Uagut sungiusimasatsinniit allaaneroqaat, Lykke Frank Hansen oqarpoq.
Kalaallit Nunaata nunarsuarmi pissartanngorniunnermi peqataanera aamma unammisartut illersuisullu unamminermi siullermi maluginngitsoorneqanngillat.
Qiimanerat nunarsuarmilu pissartanngorniunnermi peqataanerminnik tulluusimaarnerat norskit nunanut allanut unammisartuisa sungiusaasuata tiguartissutigaa:
- Kalaallit isiginnaartut, holdiminnik illersuisut isertitsinernillu tamanik qiimmatsaatiginnittut tulluusimaartuupput. Aamma Kalaallit Nunaanni arnat assamik arsartartut nunarsuarmi pissartanngorniunnissamut anngunnerannik tulluusimaarutiginnilluinnarput, norskit nunanut allanut unammisartuisa sungiusaasuat, Thorir Hergeirsson unamminerup kingorna tusagassiortunik katersortitsinermi oqarpoq, nangillunilu:
Nunanit allanit unammeqataajuaannartunit allaanerulaarput, inuit nukatsinneqarpallaalaarsimasutut ajugaanissaq kisimi isumaqartutut isigilertarpaat. Holdinik peqataaginnarneq aamma angisuujutitsisunik takulluni nuannerpoq.
Aallartinneq tupaallannartoq
Norgemut 43-11-mik ajorsarneq holdit marluk akornanni assigiinngissutsimik aamma takutitsivoq.
Kisianni amerlanerpaat tupaallaatigisaanik unamminerup aallartinneranit minutsit 15-it qaangiuttut Norgemeersut 8-6-iinarmik siuaqqapput.
- Naamik, ilimasuutiginngikkaluarpara. Isumaqarpunga sapinnginnitsinnik takutitsinerput nuannerluinnartoq. Tupaallalaarsoraakka. Kisianni sapinnginnitsinnik takutitsinerput torrattuusoraara, Ivalu Bjerge oqarpoq.
![](/sites/default/files/styles/image_934x467/public/2023-11/20231129-220717-L-1920x1280we.jpg?itok=o4ECwKmB)
Nunanut allanut unammisartut sungiusaasuata Anders Friisip takutitsineq unamminerup kingorna ilorrisimaarnartuunerarpaa:
- Ajornakusoortorujussuuvoq, tamanna aamma piareersarfiginikuuarput. Minutsini qulinit 12-inut angumalaarnerput soorunami nuannaarutigaarput. Tamanna soorunami tulluusimaarutigalugulu tupaallaatigilaarparput, nunanut allanut unammisartut sungiusaasuat oqarpoq.
Tallimanngornermi unammeqqissasut
Naak amerlasuut naatsorsuutigereersimasaattut Norgemut ajorsangaatsiartoqaraluartoq unamminermit assigiinngitsorpassuit nunanut allanut unammisartut unamminerit ingerlaqqinneranni atorsinnaavaat.
- Isumaqarpunga piumassuseqarluarnerput aallartilluarnerpullu ingerlateqqissinnaagipput. Naak unamminerit ilaa ajornakusuussagaluartut tamarmik ilorrisimaarutiginissaat eqqaamassavarput, Ivalu Bjerge oqarpoq.
Nunanut allanut unammisartut sungiusaasuata unamminermi periaatsit pitsaasut arlallit aamma maluginiarpai.
- Oqaluuserinerpaasatta ilagigamikku, takutitsilluarsimalluta maanngaanniit aallarusulluta, Taamaaliorsorivippugullu. Unamminitsinni iliuuserpassuagut nuannaarutigisinnaavagut, tamakkualu pissartanngorniunnermilu eqqaamassavagut, Anders Friis oqarpoq.
Nunanut allanut unammisartut tallimanngornermi Korea Kujallermut unamminissaminni pitsaasumik iliuuseqarsinnaanissaminnik aamma ilimasulluarput.
- Aap, tamanna ilimasuutigaara. Unamminissatsinnut tamanna anguniagariuarparput, Lykke Frank Hansen oqarpoq.
Korea Kujallermut unammineq tallimanngorpat nalunaaqutaq pingasunut KNR-ikkut aallakaatinneqassaaq.