Immikkut ilisimasalik nunarsuarmi pissartanngorniutinnginnermi: Arnat periarfissaat ima annertutigipput

Nunanut allanut unammisartut assammik arsartartuunerminni unammineq ajornarnerpaagallartoq pingasunngorpat unammissutigissavaat.

Taakkumi assammik arsartartut pikkoringaatsiartut Norgemeersut naapissavaat. Norge unammeqattaarnerni kingullerni pingasuni ajugaanerpaatut inissittarlunilu ajugaanermi erinarsortarpoq.

 - Ajornakusoortorujussuunissaa naatsorsuutigissavarput. Isertitsiffiginiarnissaat ajornakusuussaaq, Noah Mølgaard, ukiut 30-t sinnerlugit timersorneq pillugu oqaaseqartartoq oqarpoq.

Nunarsuarmi pissartanngorniunnissamut arsartartuni piukkunneruneqartut misissoraanni Norge nunarsuarmi arsartartuni annerpaani ulluinnarni unammisartut arlallit nassaassaapput.

- Norge nammineq arsarfimmini arsartussaagami naatsorsuutigineqartariaqarpoq tamaviaarsuaarlutik sukkasuumik sakkortuumillu arsarumaartut. Taamaattumik aamma sungiusaasuminninngaanniit ilisimatinneqareerput dommer siullerpaamik siggareerpat taava naggataamik siggarnissaata tungaanut 5. gearimik tamaviaaginnaavillutik arsassasut, Noah Mølgaard oqarpoq.

Taakku kamassaalaarsinnaavagut - immaqa

Kalaallilli arnat assammik arsaallutik nunanut allanut unammisartut puljeqataat allat taama mersernartiginngillat.

Norgemummi unammeqqaarnerup kingorna Korea kujallermeersut unammineqassapput, nunanullu allanut unammisartugut tassani periarfissaginnerussangatinneqarput.

Korea Kujallermit nunanut allanut unammisartut nutaamik sungiusaasortaarnikuupput, oqaluttuarisaanermilu siullermeertumik aatsaat Europameersumik sungiusaasoqarlutik.

- Nutaamik unammeriaatsimik atuinialerput, tamannalu suli inissilluarsimarpasinngilaat. Nunatta Korea Kujallermut unamminermini pointinnanngissaata piumanissaa annertuallaassaaq, kisianni ilisimaneqanngilaq, Noah Møllgaard oqarpoq.

Taannali illersuisut suna ukkatarissaneraat isumassarsiatsialaqarpoq.

- Korea Kujallermiummi malunnaateqartumik unammisartortaqarpoq. Taanna unammisartuni tusaamaneqarneruvoq:

- Unammisartui amerlasuut Korea Kujallermi unammisarput, ataaserli Ryu Eun-Hee Ungarnimiut unammisartuini Győrimi unammisartuuvoq. Taanna isertitseqattaarlunilu ikiuilluartarpoq.

Taanna mattunneqarsinnaaguni Noah Mølgaardip unammiffiup illuatungaani periarfissamik allamik aamma takusaqarsinnaavoq, tassanilu angissutsit pingaaruteqarsinnaallutik:

- Angisoorsuunngillat, arsartutta angeqatigipajaarpaat, immaqa nuannersunik takusaqaqattaarumaarpugut, Noah Mølgaard oqarpoq.

Timikkut nukitunermik misiliineq

Unamminissat pingajussaat kingullerlu, tassani Østrig unammineqassaaq, taakkulu Korea kujallermiunut mikisunut sukkasuunullu sanilliukkaanni muminganiipput:

- Østrigip arsartui, qeqqani arsartui assersuutigigutsigut tamarmik 1 meter 80 sinnerlugu angissuseqarput. Nukittuujupput, kalaallit arsartuiniit oqimaannerupput, taamaattumik 6-0-imik taasagaannik assersuillutik aallartippata kalaallit appakaanniarnerat ajornakusoortorujussuusussaavoq. Tassani taama sukkasuumik saassusseriataarnikkut periarfissarsisarnissarput tassani unamminermi neriuutigiinnartariaqarparput, Noah Mølgaard oqarpoq.

Imminut assortuuppalussinnaavoq, kisianni Østrigip piginnaaneqarfiani sanngiiffik immaqa nassaarineqarsinnaavoq.

- Unammisartut angippata arriitsumillu unammisarpata taava immaqa sukkassuserput atorsinnaavarput. Unamminerup ingerlanerani Østrigimiut nukittuneranit immaqa qasulissaagut, taanna oqarpoq.

Kisianni tassa nunatta unammisaqattaagassai ajornaatsuunngillat. Pointimik ataatsimik marlunnilluunniit periarfissaqarnissamut atatillugu Noah Mølgaard ima akissuteqarpoq:

- Periarfissaq annikitsuaraarsuuvoq.