Anføreriusimasoq assammik arsartartunut siunnersuuteqartoq: Qanoq inerneqarumaarnera oqaatigereerneqarsinnaanngilaq
Arnat assammik arsartartut nunatsinni unammisartut atisaannik atorlutik nunarsuarmi malinnaavigineqarnerpaami peqataanissaannut piffissaq sivisujunnaarpoq.
Kalaallit nunanut allanut unammisartut nunarsuarmi pissartanngorniunnerup Stavangerimi aallartinnerani Norgemut novembarip 29-ani unammissapput.
Aningaasanoorutinik eqqoriaasitsisartut amerlanerpaartaasa Norge pissartanngortussatut ilimaginerpaavaat.
Anførerillu Ivaana Holmip unamminissaq annertussusaa qularutiginngilaa, piareersimallutilli oqaatigaa:
- Piareersimavugut timikkut, kisianni soorlu taktikkikujuit tamakkua eqqarsaatigalugit soorunami unamminnginnitsinni ullualuit sioqqullugit piareerumaarput. Trænerutta tamakkua isumagisassat. Kisianni uanga piareeqqavunga Norgemukarnissannut, taanna qularnanngilaq, assammik arsartartut, anføreriat oqarpoq.
Nunanut allanut unammisartut nunarsuarmi pissartanngorniuteqataanikortaqanngillat, taamaammat qanoq nalaataqassanerlutik paasisaqarfigilaarsinnaavaat.
Naak nunatta VM-imut peqataaneranit ukiut 22-t qaangiutereeraluartut taamanikkut maannakkullu assigiissutsit arlariit sanilliunneqarsinnaapput.
2001-imi anføreriusup, Ella Grødemip pissartanngorniutiveqataanerup qanoq innera eqqaamalluarsinnaavaa:
- Mersernarpoq, killitsinnarpoq nuannersuaarlunilu. Unammisartut angisuut fjernsynikkut takusimasat saanniinnissaq ittuukujunnarlunilu ajugaaffigineqarnissaq mersernarpoq, Ella Grødem oqarpoq.
Nalaatsornerulluinnartoq
Nunatta ukioq manna puljeqatai tassaapput Norge, Korea Kujalleq Østrigiulu. Tassanilu 2001-imi unammisut puljerisaanit unammeqataareernikut arlaliupput.
Taamani nunatta puljeqatigisai tassaapput Rusland, Korea Kujalleq, Østrig, Jugoslavia, Japanilu. Taamanilu unammeqataaqqittut marluk Østrig Korea Kujallerlu Ella Grødemip unammisatut assigiinngilluinnartutut eqqaamavai:
- Holdit taakku marluk assigiinngitsorujussuupput. Korea kujallermeersut sukkasoorujussuullutillu teknikkigissaarput, Østrigimeersullu nukeqartorujussuullutillu nukissaqartorujussuupput, taanna oqarpoq.
Unammeriaaserlu taanna allanngungaarsimanngitsoq takussutissaqartorujussuuvoq.
Holdit taakku marluk Norge peqatigalugu aamma unammineqartussaapput. Unammisartut pitsaasut isiginnaarneqartussaapput, tamannalu Ivaana Holmip aamma qilanaaraa:
- Nunat naapitassagut assigiinngitsorujussuupput. Kisianni tamarmik pikkorissorujussuupput assorujussuaq. Eqqarsaatigiinnarlugu aamma tulluusimaarnarpoq nunat taakku naapittussaallugit, pikkinartukujuuvoq uaguulluni, Ivaana Holm oqarpoq.
Nanertuutaasoq iperarlugu
Nunatta 2001-imi angusaqangaatsiarnissaa aamma siulittorneqanngilaq, kisianni tupaallatsitserujussuangajappoq.
Japanimummi ajugaanissamut minutserpassuujunnaaqqasut Japan siuarpoq ajugaallunilu.
Taamaammat ajugaasoqarsinnaasoq, Ella Grødem isumaqarpoq:
- Oqaatiginissaa ajornannginneruvoq, kisianni imminut nanertuutigilersitat iperarlugit. Peqataaneq ilorrisimaarutigisiuk ajugaaneeqqallu nuannaarutigalugit. Qanoq inerneqarumaarnera oqaatigereerneqarsinnaanngilaq. Japanimut unamminerup aappaani ajugaanissarput takorloorsimanngikkaluarpara, Ella Grødem oqarpoq.
Imminut eqqarsaatiginissaq pingaarnerpaarpaavoq:
- Qanoq iliorsinnaanermik tunngaveqarnissamut tunngavoq. Ilussinni imminut naatsorsuuteqarfigileritsi, pissutsillu nalaakkumaakkasi piareersarfigisigit.
Siunnersuutillu taakku Ivaana Holmip nunanut allanut unammisartoqatiminut ingerlateqqinniarpai:
- Siunnersuuterpassuit soorlu unammisassatta niveau-i eqqarsaatigalugit qaffasissorujussuupput, ukua oqarpoq små sejre taakku uagut aamma nuannaassutigisarnissaat, ikioqatigiilluta, taakkua pingaartorujussuartut uanga aamma nammineq isigivakka, ikioqatigiinnissarput taamatut, suunukua pikkoriffigigigut, Ivaana Holm oqarpoq.
