Kalaallit Norgemut unammissasut: Imaannaassagunanngeqaaq
Neriuut piviusunngorpoq.
Nunanut allanut unammisartut Najaaja Lyberth Andrea Heilmannilu nunarsuarmi pissartanngorniunnissamut peqataalerunik Norge gruppeqatigissallugu neriuutigaat. Taamalumi pisoqarpoq. Sverigemi Göteborgimi ullup-qeqqata missani makitsisoqarmat tamanna paasineqarpoq.
- Immiikkuullarerujussuassaaq, fjernsynikkut malinnaavigiuaannakkagut qanimut naapittussanngorlugit pissanganarpoq. Piareersarnissaq tullinnguuppoq, Andrea Heilmann oqarpoq.
Rina Lorentzen isumaqataavoq:
- Ilimagisanniit nuannernerujuuvoq, tassami nunarsuarmi pitsaanerpaat pissartallu Nora Mørkikkut Oftedalikkullu (Stine Bredal Oftedal, aaqq.) unammisussanngorpagut.
Qaffasissuseq alla
Nunanut allanut unammisartut sungiusaasuat Anders Friis makitsinerit qanoq isumaqarfiginerai aperigatsinni ima akivoq:
- Norge VM-imi ajugaasussatut ilimagineqassagunartoq unammisussanngorparput. Unammineq assoroorfiussaqaaq, aammali misigisaq tupinnassaqaaq. Nuannerlunilu aappaatigooqalaarpoq.
Norgemulli unamminissaq qilanaarinerpaavaa.
- Norskinut Norgemi unamminissarput imaannaassagunanngeqaaq. Misiginissaanut qilanaartorujussuuvunga.
Norgemut unamminissaq nunanut allanut unammisartut sungiusaasuata aarleqqutiginngilaa. Kisianni:
- Norgemut ajugaanissarput naatsorsuutiginngilarput. Misigisaqarnissarput, ataqqinassutsitta pigiinnarnissaa erfalasullu nittarsaannissaa pingaarnerupput, Anders Friis oqarpoq.
Nunatta Norgemik gruppeqateqalernermi saniatigut Korea aamma Østrig gruppeqatigissavai. Naallu nunatta unammisartui Østrigimiunit pikkorinnerusutut oqaatigineqaraluartut, unamminissaq ajornaatsuinnaanavianngitsoq sungiusaasoq oqarpoq.
- Østrigimiunit pikkorinnerusutut inissinneqarnerput nalunngilara, Savalimmiunili unammimmata isiginnaarpagut. Taakku europami pikkorinnerpaat akornanni arsartartorpaaloqarput. Tassa unammisassagut allatut piumasaqaateqarfigineqarput pikkorilluinnartullu akornanni unammisartuullutik.
Kalaallit arnat nunanut allanut unammisartut oqaluttuarisaanermi aappassaanik VM-eqataassapput, pissartanngorniunnerillu Danmarkimi, Sverigemi Norgemilu novembarimi decembarimilu pissapput.