Nuna tamakkerlugu sungiusaasoq VM-eriartussat pillugit: Ataqatigiinneq pingaaruteqassaqaaq

Ajoqusernerit naartusorlu iligiit VM-imut annguttut maannalu VM-eriartussat arsartuisa allannguuteqarnerannut pissutaapput.

Allattoq Noah Mølgaard

novembarip 01-at 2023 12:54

Arnat assammik arsarnermi VM-rnissaannut Nunarput sinnerlugu unammiartortussat ullumi saqqummiunneqarput arsartullu 18-it Nunarput avammut nittarsaatissavaat. Taakku assammik arsallaqqissusertik tunngavigalugu toqqarneqarput.

Aamma atuaruk Assammik arsarneq: Aajuku Nunatta VM-riartitassai

Toqqaalernermili pisinnaasat allat aamma maluginiarneqartarput iligiit sivisuumik ataatsimoornissaat pissutigalugu.

VM-eriartussanik toqqaaneq sioqqullugu Danmarkimi Nuummilu sungiusatigiittoqarnerani sungiusaasoqatigiit maluginiagaasa ilagaat arsartut sorliit ataqatigiilluarnerunersut.

- Takutitsilluassaanni ataqatigiinneq ataqatigiilluarneq pingaarutilerujussuuvoq, assammik arsarnermi nuna tamakkerlugu sungiusaasoq Anders Friis KNR-imut oqarpoq.

- Toqqarneqartut tamarmik ajunngillat aamma isumaqarpunga tamanna arsarfiup avataani pingaaruteqarluarumaartoq, Anders Friis oqarpoq.

Peqataasinnaannginneq ajoqusernerillu

Eqqarsartaatsigut iligiit iluanni nukittussuseq kaammattoqatigiinnerlugu atorfissaqartinneqartussaapput VM aallarnerlugu nunarsuarmi pissartat Norge namminneq arsaaffianni kalaallit unammissammatigit.

- Ataatsimoornissarput pingaaruteqarluinnarpoq. Nalunngilarpummi timersornikkut suliassaq ajornarluinnarunartoq naammassiniartussaagipput, tamannalu ilimanarpoq eqqarsaatsikkut suli sakkortunerussasoq. Tassani taamaattumik ataqatigiinneq iligiilluarnermmillu pingaartitsineq pingaaruteqarluinnartussaapput pitsaasumik ingerlariaqqinniassagutta, Anders Friis oqarpoq.

Aamma atuaruk Kalaallit Norgemut unammissasut: Imaannaassagunanngeqaaq

Arsartussatullu toqqakkat 18-it aqqi misissuataaraanni arsartut arlallit VM-imut anngunniunnermi peqataasut toqqakkat akornanniinngillat.

Pissutaasorlu nuna tamakkerlugu sungiusaasup Anders Friisip nassuiarpaa:

- Ajoraluartumik arsartut ilaat annertuumik ajoqusernikuupput, Anders Friis oqarpoq.

- Ajaaja Silassen seeqqulukkami sivisuumik uninngagallartussaavoq VM-imut anngunniunnermi ajoqusernikuugami. Panu Grønvold VM-imut anngunniutiliivilluta ajoqusernikuuvoq. Neriuppugullu taakku erininarserianngitsoq piareeqqikkumaartut.

- Peqataanngitsuni maluginiarneqartut pingajuat tassaannguatsiarpoq Najaaja Lyberth Heilmann. Taannali VM-miit pikkunarnerujussuarmik misigisaqartussaavoq meerartaaqqittussanngorami, Anders Friis oqarpoq.

Assammik arsarnermi VM Stavangerimi novemberip 29-ani aallartissaaq. Kalaallit VM-imi unammineri tamarmik KNR-TV-mi aallakaatinneqassapput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.