Assammik arsarneq: Aajuku Nunatta VM-riartitassai
![](/sites/default/files/styles/image_934x467/public/article_images/nachc21-21565.jpg?itok=XowoNHnV)
Nunarput assammik arsarnermi VM-mut anngummat aasaq arsartuusut maannalu novemberip naaneraniit VM-qataasussat allannguuteqalaarput.
Arsartut ilaat junimi Nunarput tamakkerlugu nuannaarutaaqisumik VM-mut annguttoqarmat ajoquseqqallutik peqataanngitsut maanna piareerput.
Tunuani arsartartoq Lykke Frank Hansen isuanilu arsartuusartoq Aviana Kâjangmat junimi peqataasinnaanngitsunut ilaapput. Taakku maanna Nunarput sinnerlugu unamminissaminnut piareerput unamminermilu siullermik nunarsuarmi pissartat Norgemeersut kalaallit novemberip 29-ni unammissavaat.
TV-mi toqqaannartoq
Kalaallit puljeqataat allat tassaapput Sydkore aamma Østrig amerlasuunillu ilimagineqarpoq taakku aamma kalaallinut ajugaajumaartut.
Piukkunnaatilik pikkorilluinnartoq Ajaaja Silassen VM-mut anngunnermi peqataasut sivisuumik ajoquseqqagami peqataassanngilaq. Taamatuttaaq saassussinermi aqutsisuulluartartoq Najaaja Lyberth VM-mi peqataasinnaanani nalunaarpoq.
Unamminerit aallarniutaasut decemberip pingajuani naggaserneqassapput iligiit pingasut qaffasinnerusumik inissinniunnissanut ingerlaqqissallutik. Puljemi sisamaatut inissittut appassinnerusuni inissinniunnissanut Presidents Cupinik taaneqartartumut Frederikshavnimi pisussamut ingerlaqqissapput.
Unamminernili aallarniutaasuni assersuutigalugu pingajuattut inississagaluarunik kalaallit Trondheimimi unammeqqissapput.
Kalaallit unammineri tamaasa KNR-TVp aallakaatissavai apeqqutaatinneqarani inissinniunnerni sorlerni unammissanersut.