Assammik arsaanneq: Nunanut allanut unammisartut VM-eriartigatik sungiusartut

Nunatsinni arnat assammik arsaallutik nunanut allanut unammisartuisa nunarsuarmi ukioq manna pissartanngorniukkiarnissaannut unammisassamillu siulliit norskit Norgemi Stangaverimi unamminissaannut qaammataannanngungajalerpoq.

Taamaammat nunanut allanut unammisartut VM-eriartortigatik Nuummi sapaatit akunnerata naaneranili naggammik sungiusaleruttorput.

- Piareersaleruttorpugut, VM-imut anngunniunneq naammassimmalli piareersarluta aallartinnikuuvugut. Unammisartullu ataasiakkaat qangali sungiusarlualereerput, nunanut allanut unammisartut sungiusaasuat Anders Friis oqarpoq.

Nuummi Inussivimmi sungiusartut 19-iupput, taakkunanngali 18-it kisimik, tassa 16-it unammeqataasussatut marlullu paarlatsissamaatissatut VM-eqataasinnaapput. Taammaamat sungiusartut tamarmiunatik, tassa ataaseq minillugu peqataassapput.

VM-eqataasussanik toqqaanissi imaannaanavianngitsoq, nunanut allanut unammisartut sungiusaasuata nassuerutigaa. 

- Toqqaanissara imaannaanavianngilaq. Unammisartut akornanni pikkorissorpassuaqarmat toqqaanissara imaannaanavianngeqaaq, taanna oqarpoq.

Sulernertik pulaffigisassarigaat

Nunanut allanut unammisartut agguaasuat isorlerisartagaallu GSS-imeersoq, Andrea Heilmann, VM-eqataanissamut sungiusartunut 19-inut ilaavoq.

- Akuunissara neriuutigivara, aamma sukataassutigivara. Neriungaarpunga tassa akuujumaarlunga taakkunani unammisussani, taanna oqarpoq.

Nunanulli allanut unammisartut timersortarfimmi sungiusaannaratik eqqarsartaatsimikkut aamma piareersarput.

- Piareersarluarpugut, kisiat aamma una ilaa pulaffigisassarput tamatsinnut nutaajuvoq sumununa unammiartulersugut?, nunanut allanut unammisartut agguaasuat oqarpoq.

Suli toqqaanngitsoq

Sungiusartuni 19-iusuni kikkut toqqassanerlugit, nunanut allanut unammisartut sungiusaasuat suli aalajanginngilaq.

- Toqqaapallakkusukkaluarpugut, kisianni pissutsit assigiinngitsut pissutaallutik utaqqilaarallalaassaagut, ajoqusernerillu annikitsut qanorlu inneri takoqqaalaassavagut, taanna oqarpoq.

Sapaatit akunneri marluk qaangiutsinnagit toqqaajumaarluni, Anders Friisip neriuutigaa. Toqqakkanili uummateqarfigalugu unammisartuunissaat naatsorsuutigisinnaagipput, taanna oqarpoq.

- Neriuppunga assammik arsaannermut paasisimasaqartut nalunngikkaat nunarsuarmi pissartanngorniuteqataaneq imaannaanngitsuusoq. Nunarsuarmimi unammersuarnissamut anngunneq tassaavoq aamma nuannaarutissaallunilu tulluusimaarutissaq, nunanut allanut unammisartut sungiusaasuat Anders Friis oqarpoq.

Unammisassamik siulliit Norgemi novembarip ulluisa 29-anni unamminissaannut sapinngisartik tamaat sukataarnissaminnut tunniusimanissaminnullu piareersarlutik, Andrea Heilmann aamma oqarpoq.

Arnat assammik arsaallutik Danmarkimi, Norgemi Sverigemilu novembarip ulluisa 29-anniit decembarip ulluisa 17-iata tungaanut pissartanngorniutissapput.