Assammik arsarnermi VM: Stavanger kalaalerpassuit Islandimiorpassuillu ornissavaat

VM-rtoqarnissaani gruppet marluk Atlantikup avannaamiunit peqataaffigineqartut unamminerit aallarniutaasut Stavangerimi novemberimi decemberimilu ingerlatissavaat

Allattoq Noah Mølgaard

juulip 25-at 2023 09:01

Kalaallit aamma Islandimiut arnat assammik arsarlutik VM-qarnissaanni novemberimi decemberimilu immikkut gruppeqassapput.

Iligiilli taakku marluk ataatsimoorutigaat Norgemi illoqarfimmi Stavangerimi gruppeminni unammissagamik.

Aamma atuarukKalaallit norskinut pissartanngussangatitanut unammissasut

Kalaallit illersuiartussamaartut Stavangerimi hotelinut inniminniisalereerput aammalu ilimagineqarluni Islandimiorpassuit Norgemi illoqarfimmut tassunga tikerarumaartut.

- Islandimiut nunanut allanut unammisartui Stavangerimut tikerassutaajumaarput. Islandimiorpassuit Rogalandimi (nunap immikkoortua Stavangerip inissisimaffia, aaqq.) najugaqarput, tamannalu VM-rtoqarnerani nuannattoqarnissaanut pitsaaqutaaginnassaaq, Norgep nuna tamakkerlugu sungiusaasua Thorir Hergeirsson Norgemi assammik arsartartut kattuffiata nittartagaani issuarneqarpoq.

Sakkukinnerit

Kalaallit assigalugit Island gruppemi sakkortuumiipput Frankrig, Slovenien aamma Angola unammissallugit.

Arnat VM-rnissaanni gruppe C-mi kalaallit sakkukinnerpaatut inissisimanissaa norskit sungiusaasuata ilimagivaa.

Aamma atuaruk Assammik arsarneq: Siunissaq ungasinnerusoq isigalugu pilersaarusiorneq VM-mut anngussutaavoq

Gruppemi tassaniipput kingullermik nunarsuarmi pissartaasut Norge, Sydkorea aamma Østrig novemberip 29-aniit Stavangerimi unammisaqattaartussat.

Frederikshavnimi nangissavaat

- Kalaallit ilisimaneqarpianngillat assammik arsarnermi nunat sakkukinnerpaat akornanniit annguttuullutik, Thorir Hergeirsson oqarpoq.

- Peqataanerat assorujussuaq nuannerpoq – alornaqutaajumaarput Stavangerimilu unamminerni immikkuullarissutaajumaarlutik. Ilimanarporli ingerlaqqinnissamut gruppetsinni periarfissakinnerpaanissaat, Hergeirsson oqarpoq.

Aamma atuarukNunarput VM-imut annguppoq

Assammik arsarnermi VM-mi unammeriaasissaq

Puljenit tamanit iligiit pingasut inissinniunnernut qaffasinnernut ingerlaqqissapput iligiillu ingerlaqqinngitsut inissinniunnerni appasinnerusuni unammeqqissallutik Presidents Cupimik taaneqartartumi.

Presidents Cupimi unamminerit tamarmik Frederikshavnimi decemberip arfineq aappaanniit 13-ta tungaanut pissapput. Assammik arsarnermi VM naggaserlugu decemberip 17-at Jyske Bank Boxenimi Herningimi unammisoqassaaq.

Taassumalu naliliinera eqquutissappat Atlantikup avannaamiut assammik arsarnermi nuannannerat Frederikshavnimi nangeratarsinnaavoq.

Island kalaallisulli ingerlaqqinnissamut periarfissaqarpianngilaq.

Taamatullu inissittoqassappat kalaallit aamma Island normu 25-miit 32-mut inissinniuteqataassapput unamminerillu taakku Frederikshavnimi decemberip arfineq aappaanniit ingerlanneqassapput.

Assammik arsarnermi VM Danmarkimi, Norgemi Sverigemilu pissaaq. Finale Herningimi timersortarfissuarmi Boxenimi decemberip 17-at pissaaq.