Assammik arsarneq: Siunissaq ungasinnerusoq isigalugu pilersaarusiorneq VM-mut anngussutaavoq

Siunissaq ungasinnerusoq isigalugu pilersaarusiorsimaneq sapaammi ualikkut Nuummi timersortarfissuarmi Inussivimmi naggaserluarneqavippoq, assammik arsarnermi arnat VM- ut anngunniunnerat naammassisoq dommerit siggarnermikkut nalunaarutigimmassuk.

Finalemi kalaallit Canadamut 17-15-mik ajugaapput. Isiginnaartullu nuannateqisut akornanni pisittaarlunilu qitaasarluni nuannaaqisoq tassaavoq siornatigut arnat nuna tamakkerlugu sungiusaasuat Johannes Groth.

Pissutissaqarluarpormi

Johannes Groth nuna tamakkerlugu sungiusaasutut januarip aqqarnat 2017 tusagassiutinut nalunaaruteqarpoq. Tassani ilaatigut allappaa anguniakkatut siunniunneqartut arnat nunanut allanut unammisartut 2023-mi VM-mut anngutissasut.

Oqaasissaaleqivoq inuit nuannatileruttortut KNR-mit sapaammi ualikkut naapinneqarami, taamaasineranilu VM-mut anngunneq piviusunngoreerpoq.

- Naluara massakkut qanoq oqassanerlunga, VM-mut anngunneq oqaaseqarfigissallugu Johannes Groth aallartisarpoq.

- Aajuku assammik arsartartut pikkorissut 18-it. Puigussanngilagulli unammisartutut peqataasarsimasut, sungiusaasut aqutsisullu siunnerfeqarlutik suliniarsimasut, Johannes Groth qujaniarpoq.

Misilittagaqarneq iluaqutaavoq

VM-mut anngunniuttoqarnerani kalaallit arnat assammik arsartartut 2019-mi bronzennapput 2021-milu finalemut anngukkamik tassani Puerto Rico ajorsarfigaat.

Taamaattumik utaqqikatajuissuseqarniarnarsimavoq.

- Assorujussuaq pingaaruteqarpoq ukiut marluk matuma siorna finalemi unammisimanerput. Unammeqataanerit tamarmik ilikkagaqarfiujuaannarput. Finale sioqqullugu aamma eqqartorparput takutikkusullugu misilittagaqarnerulluta, Andrea Heilmann anngukkiartornermi aqqutaa tamaat peqataasoq oqarpoq.

Misigissutsit aniatinneqarput unammineq naammassisoq nalunaarlugu dommerit siggarmata.

- Misigisaq pikkunaqaaq. Anguniakkap anguniarnerani aqqutip takisimaneran eqqrsaatigalugu qamuuna attortinnarpoq, anføreriusoq Ivaana Holm KNR-mut oqarpoq.

Makitsineq

Canadamiulli akunnattuugasitsileraluarput mumereernermi siuaraluaramik.

Kalaallilli arnat sukataarluarnermikkut angummateqqipput.

- Pissanganangaarmat pikkunarluinnarpoq. Paasiinnarpara assammik arsartartunut illersuisuulluni qanoq tamaviaarnartigisinnaasoq, Johannes Groth oqaluttuarpoq.

- Pissanganermik isiginnaajunnaarakkit tunuanukarpoq. Kalaallit isertitserpallattut nuannattoqaleraangat aatsaat alakkalaartarpunga, Johannes Groth oqarpoq.

VM-mut anngunniunnerit nunarsuaq tamakkerlugu naammassipput.

Puljenut inissitsiteraluni julip arfernat makitsisoqassaaq. Tassani paasinarsiumaarpoq unamminerni aallarniutaasuni kalaallit sumi unammissanersut.

Assammik arsarnermi VM Danmarkimi, Norgemi Sverigemilu unammissutaajumaarpoq.