Nunanut allanut unammisartut VM-imut anngunniunnerminni isiginnaartut tapersersuinerannut qujasut

Nuummi Amerikap avannaani Caribiamilu pissartanngorniunneq aamma VM-imut anngunniunnersoq ingerlanneqarmat, kalaallit arnat nunanut allanut unammisartut ajugaagamik, Danmarkimi, Sverigemi Norgemilu ukiaru novembarimi VM-eriarnissartik isumannaarpaat.

Unammisunit nunanullu allanut unammisartut sungiusaasuannit, Anders Fiisimit qiimmatsanneq, sapaammi ualisoq misigineqarpoq.

- VM-ilerpugut ingasak. VM-ilerpugut!, unamminerup ingerlarnga tamaat unammeqataasoq, Andrea Heilmann oqarpoq.

Isiginnaartut tapersersuinerat pingaaruteqaqisoq

Ajugaaniutivinnermi kalaallit kingualeraluarput, unamminerli naammassimmat kalaalit 17-15-imik Canadamut ajugaapput. Ajugaanerli isiginnaartut tapersersuinerannit aamma sunniuteqaqataasoq, Andrea Heilmann oqarpoq.

-  Nuan. Tuppallernaq isiginnaartut tapersersuisut taavalu taama tunniusimatigalugit isiginnaartut. Nukipparparsuarnik tunisisut qujaffigerusuppagut. Qamanngaanniit toqqorparput taamatut isiginnaartorpassuit, isiginnaartut qujanaraujussuaq, taanna oqarpoq.

Nunanut allanut unammisartunut sungiusaasup, Anders Friisip ajugaanertik aamma qiimmatsaatigaa.

- Assut nuannerpoq, isiginnaartut qiviaannarsinnaavagut. Unammineq sakkortuvoq, aamma tamanna naatsorsuutigereerparput, kisianni nuanneqaaq, Kalaallit Nunaat tamakkerlugu pilluaqqorujussuarparput. Ingasaqaaq, nunanut allanut unammisartunut sungiusaasoq oqarpoq.

Arsaqatigiimmi ataasiinnaat kisimik nunarsuarmi pissartanngorniunnissamut ingerlaqqittussaapput, Canadamut ajugaanerup saniatigut nunarput aamma Mexicomut, Cubamut USA-mullu ajugaavoq.

Tassallu maanna paasinarsivoq nunarput ingerlaqqittussanngortoq, taamaalillunilu nunarsuarmi arnat assammik arsallaqqinnerpaat akornanni Danmarkimi pisussami Danmarkimut, Norgemut Sverigemullu unammisussanngorluni.