Norca: Ivalu Bjerge unammersuarnermi naleqarnerpaatut toqqagaavoq
Assammik arsarluni VM-mut anngunnerup saniatigut suli nuannaarutissaqarluarpoq, anngunniunneq Norca naggaserlugu takutitsilluartunut nersornaasiisoqarmat.
Iligiinni pitsaanersiukkani Nunatsinneersut marluk toqqagaapput unammersuarnermilu nersornaatit ataqqinarnersaat 22-nik ukiulimmut Ivalu Bjergemut tunniunneqarluni. Taanna tassaavoq arsartutut naleqarnerpaatut nersornaat MVP-mut naalisarneqartartoq.
Unammersuarnermi arsarluaqattaaqaaq aamma kalaallini isertitsinersaalluni katillugit 22-nik isertitsilluni, taakkunanilu naleqarnerpaannguatsiartoq finalemi sekundit 30-it ataallugit amigaataalersut isertippaa unammineq 17-15-mik naammassineqartillugu.
Andrea Heilmann unammersuarnermi saamerlermi isorlersaalluarnerpaatut toqqagaavoq kiisalu Najaaja Lyberth qeqqani aqutsilluarnerpaatut toqqagaalluni.
VM-mut makitsineq
VM-mut anngunniunnerit nunarsuaq tamakkerlugu naammassipput iligiit 31-it anngummata. Maanna wildcardimik taaneqartartoq Europami iligiit arlaannut tunniunneqassaaq Norge nunarsuarmi pissartaasutut aaqqissueqataasutullu inissamik immikkut pilersitsimmat.
VM-ip naggataarneqarnera Danmarkimi, Norgemi Sverigemilu novemberip 29-niit decemberip 17-ta tungaanut ingerlassaaq.
Puljenut maktsineq julip arfernat pissaaq. Tassani aalajangerneqarumaarpoq unamminerni aallarniutaasuni kalaallit unamminissaat sumi pissanersut.
Puljeniit iligiit pingasut akunniliullugu unamminernut ingerlaqqittassapput sinneruttut alliit inissinniullutik unammisaqqattaarneranni Presidents Cupimi unammeqqissallutik. Unammisaqattaarnerit taakku Frederikshavnimi pissapput.
