Assammik arsarneq: Arnat nunanut allanut unammisartut arlallit Danmarkimi misiliipput
Kalaallit arnat nunanut allanut unammisartut assammik arsarnermi VM-mut piareersarnerat iluaquserneqarpoq unammisartut arlallit Danmarkimi misilittagartusalermata. Nunanut allanut unammisartuniittut amerlanersaat taamaasillutik nunatta avataaniilerput.
Arnat assammik arsarnermi nuna tamakkerlugu sungiusaasuat Anders Friis qanittumi Billundimi mittarfimmiippoq unammisartut nunatsinniit tikittut tikilluaqqujartorlugit.
Arsartut arlallit maanna Silkeborg Voelip 2. divisionimi unammisartuiniilissapput aamma pikkorinnerni ligamiittunut Silkeborg Voel aamma Ringkøbing sungiusaqataaffigisassallugit.
- Nuna tamakkerlugu sungiusaasutut tamanna assut iluarisinaarpara. Ataatsimoortut amerlanerutillugit pitsaanerussagami, nuna tamakkerlugu sungiusaasoq Anders Friis KNR-mut oqarpoq.
Imaannaanngitsut
Arsartartut qulit missaanniittut maanna Danmarkimiipput taakkulu saniatigut marluk Savalimmiuniinnerminnik ukiumik ataatsimik sivitsuillutik.
- Unamminnerullutillu sungiusarnerunermikkut pitsanngoriartuinnavissapput. Tamanna Kalaallit Nunaanniinnermi amigaatigineqarsinnaasarpoq, Anders Friis oqarpoq, nangillunilu:
- Sungiusaasumut ikiorti Kim Ostermann Petersen sungiusartitsilluartorujussuuvoq. Taamaattorli maani Danmarkimisut unammikulaartiginissamut periarfissaqanngilaq.
Nunattalu VM-riartitassaasa sungiusarnissamut periarfissat tamaasa pisariaqartissavaat VM-ip novemberip naanerani aallartinnissaa sioqqullugu.
Puljenummi makitsisoqarnerani unammilleruminaattorujussuarnut unammisussanngorput.
Unammisassaat tassaapput Norge, Korea kujalleq aamma Østrig.
- Iligiit pingasut pikkorissorujussuit inuussutissarsiutigalugu unammisartunik arsartullit Europamilu pikkorinnerni ligani unammisartut unammisussaavagut. Sakkortussamaaqaaq, Anders Friis oqarpoq.
- Aamma ammaanersiornermi Norge namminneq arsarfianni unammissavarput. Tamanna puigunngisaannagassarilerumaarpaat, Anders Friis naggasiivoq.
Kalaallit VM-mi unammineri KNR-TV-mi aallakaatinneqarumaarput.
