Trumpip Ukrainemi suli eqqissineqarsinnaasoraa: Putin oqaloqatigaara

USA-p præsidentiata Donald Trumpip Ruslandip Ukrainellu akornanni suli eqqissinissamik isumaqatigiissuteqartoqarsinnaasoraa.

Sorsunnermik ukiuni pingasuni affarmillu sivisussusilimmik unitsitsisinnaanissaq eqqartorniarlugu sapaatip-akunnerata ataatsip matuma siorna Europami siuttunik arlalinnik Ukrainellu præsidentianik Volodymyr Zelenskyjimik Det Hvide Husimi tikeraartoqareernerup kingorna, Trump ataasinngornermi taama oqarpoq.

-  Sorsunnermik unitsitsisinnaanerput suli ilimagaara, Trump oqarpoq.

Sapaatip-akunnerata siuliani ataatsimiinnerni Ruslandip præsidentianik Vladimir Putinimik aamma Zelenskyjimik ataatsimeeqatiginninnissamik Trump kissaateqarpoq. Taakkuali marluk akornanni ataatsimiittoqarnissaanik suli aaqqissuussisoqarsimanngilaq.

Donald Trump sapaatip-akunnerata siuliani Det Hvide Husimi ataatsimeeqatiginnereernerup kingorna Vladimir Putinimik oqaloqateqarsimalluni oqarpoq.

- Aap, oqaloqatigaara, Trump oqarpoq.

- Taassuminnga sumilluunniit oqaloqateqarneq oqaloqatigiinneq pitsaasuuvoq. Kinguninngualu ajoraluartumik Kyivimi (Ukrainemi illoqarfiit pingaarnersaanni, aaqq.) allamiluunniit qaartitsisoqarpoq, kamaammertorujussuuvungalu, præsidenti oqarpoq.

Washingtonimi ataatsimiinneq 

Zelenskyj Putin ataatsimeeqatiginissaanut piareersimanerarnikuuvoq, Ruslandilli præsidentiat ataatsimeeqatiginninnissaminut tunuarsimaarnerulluni. 

- Pissutigalugu taassumap (Putin, aaqq.) taanna (Zelenskyj), nuannarinnginnamiuk, Trump oqarpoq.

USA-mi præsidentip Putini Alaskami sapaatip akunnerata siuliani naapippaa. 

Sorsunneq sorsukkunnaarnissamullu aqqutaasinnaasoq, nunani siuttut marluk ataatsimeeqatigiinnerminni oqaluuserivaat. Tamannalu ataatsimiinnermut Washington D.C-mi sapaatip akunnera kingullermi ingerlanneqartumut, Trumpip, Zelenskyjip Europamilu nunani siuttut arlallit peqataaffigisaannut aqqutissiuisuuvoq. 

Nunanut allanut tunngasunut ministerip Marco Rubiop, sorsunnerup unitsinneqarnissaa eqqartorniarlugu Europami nunanut allanut tunngasunut ministerit naapeqatigisimagai, USA-mi nunanut allanut tunngasunut ministereqarfimmiit ataasinngormat nalunaarutigineqarpoq.

/ritzau/AFP