Coronamik pingasut tunillagaasut: Marluk Sisimiuni ataaserlu Qaqortumi

Coronamik tunillanneqarsimasut Sisimiuni marluk Qaqortumilu ataaseq.

Ullumi tunillanneqarsimasorsiornermi misissuinermilu tassa killifiugallartoq.

Taakkua tamarmik tuimmisartumi, tunillanneqarsimasunik sisamanik siumuiffiusumi, ilaasuupput.

Tunillatsisimasoq ataaseq Sisimiuni arlalinnik attaveqarsimanera peqqutigalugu, Sisimiuni innuttaasut tamarmik ersiuteqarnerlutik eqqummaariffigissaat kaammattorneqarput, aamma minnerpaamilluunniit ersiutinik takussutissaqartillugu misissortinnissaat pingaaruteqarpoq.

Tasssalu timmisartumi ataatsimi ilaasut tunillanneqarsimasut arfineq marluk maanna naammattoorneqarsimalerput.

Qaqortumi, ilulissani Nuummilu inuinnik sisamanik coronavirusimik tunillanneqarsimasoqartoq arfininngormat paasineqarpoq.

AAMMA ATUARUK Corona: Timmisartunut aalajangersimasunut ilaasimasut ataasinngorpat marlunngorpallu misissortikkiartornissaannik kaammattorneqartut

Nunatta nakrosaanerata oqarnera naapertorlugu inuit pingasut, tunillanneqarsimasutut paasineqartut kinguilliit, tunillanerneqarsimasutut paasineqartut siulliit qanittuanni issiasimanngillat.

- Corona tunillaatiaqisuusoq maanna pineqartoq ilimanartupilussuuvoq.Tunillanneqarsimasut ullut tallimaanni misissortikkunik tunillatsissimasutut tamatigut ersiuteqarnavianngitsut paasinarsivoq. Taamaammat ullut tallimaanni arfininngormat misissortittut angerlarsimaannarnissaat misissorteqqinnissaallu pingaartorujussuuvoq, nunatta nakorsaanera Henrik L. Hansen oqarpoq. 

Tunillaatiaqisoq, deltavariantimik taasagaat, nunatsinni maanna atugaalersimanersoq oqaatigissallugu siusippallaarpoq, misissugassatulli sapaatit akunnerata naanerani tigusat Danmarkimi nassiunneqartut, taanna oqarpoq. 

Nunatta nakorsaanerata oqarnera naapertorlugu, tunillanneqartut kingulliit coronap nunatsinnut pitsaaliornera ajornarsiartortoq takutippaa. Tamaammat kikkut tamarmik akiuussutissalersinnisssaat kaammattuutigaa.

- Maanna tunillagaasoqarnerata periarfissaqartut tamarmik akiuussutissalersinnissaat qanoq pingaartigisoq takutippaa. Akiuussutissaq tunillanneqarnissamut tamakkiisumik illersuutanngikkaluartoq, akiuussutissalerneqarsimasut tunillanneqarsimatillutik perulunnginnerusaqisut misilittakkat tamarmik ersersippaat, Henrik L. Hansen oqarpoq.

Timmisartuussinerni ukunani ilaasimasut misissortinnissaminnik kaammattorneqarput:

• Marlunngornermi 6. juuli 2021-mi GL 781 Københavnimiit Kangerlussuarmut. Issiavinni række 29-31-mi kiisalu række 41-43-mi issiasut tunillatsissimasunut qaninnerpaasimapput.
• Marlunngornermi 6. juulimi GL 427 Kangerlussuarmiit Narsarsuarmut. Timmisartoq Narsarsuarmut apuutinngilaq, aammalu Paamiut aqqusaarlugu Nuummut ingerlaqqilluni.
• Marlunngornermi 6. juuli 2021-mi GL 513 Kangerlussuarmiit Nuummut.
• Marlunngornermi 6. juuli 2021-mi GL 534 Kangerlussuarmiit Ilulissanut.
• Sisamanngornermi 8. juulimi GL 421 Nuummiit Narsarsuarmut.
• GL 4381 Narsarsuarmiit Qaqortumut (qulimiguulimmik).

Ulluni tulliuttuni misissuinissamut pilersaarutit imaapput:

Nuuk: 

• Inuit timmisartuni il.il. tunillatsissimasinnaasut nal. 10:30-miit 12:00-imut misissortissinnaapput.
• Ullut tallimassaanni misissortinnerit nalinginnaasut nalinginnaasumik 08:15-imiit 10:00-imut ammasarput.
• Misissuinerit Misissuivimmi, siornatigut Kalaaliaraasimasumi, Nuup qeqqani Brugsenip eqqaaniittumi ingerlanneqartarput.

Qaqortoq:

• Napparsimmavimmi misissuinissat nal. 09:00 ammassapput.
• Misissuineq nunap immikkoortuata napparsimmaviani ingerlanneqassaaq.

Ilulissat:

• Inuit timmisartuni il.il. tunillatsissimasinnaasut napparsimmavimmi nal. 13-imiit misissorneqarsinnaapput.
• Ullut tallimassaanni misissortinnerit nalinginnaasut nalinginnaasumik 09:00-imiit ammasarput.
• Misissuineq nunap immikkoortuata napparsimmaviani ingerlanneqassaaq.

Sumiiffinni allani ammarfissat pillugit najukkani peqqissaavinni saaffiginninnikkut paasiniaasoqarsinnaavoq.