Corona: Timmisartunut aalajangersimasunut ilaasimasut ataasinngorpat marlunngorpallu misissortikkiartornissaannik kaammattorneqartut

Qaqortumi, ilulissani Nuummilu inuinnik sisamanik coronavirusimik tunillatsissimasoqartoq ippassaq arfininngormat paasineqarpoq.

Tunillatsissimasuni taakkunani pingasut timmisartumi ataatsimi Danmarkimit nunatsinnut ataatsikkut timmisartuunneqarput. Tunillatsittut sisamaat tikittunit pingasunit arlaannit tunillanneqarpoq.

AAMMA ATUARUK Qaqortumi, Nuummi Ilulissanilu Covid-19-imik tunillatsissimasoqartoq

Inuit tunillatsissimasut coronavirusimik tunillaatiasorujussuarmik deltamik tunillatsissimasinnaasut suli ilisimaneqanngilaq. Taamaammat amerlanerit tunillatsissimanersut paasiniarlugu Namminersorlutik Oqartussat annerusumik misissuiniarput.

Misissortinnissamut ataasinngornermi juulip ulluisa aqqaneq-aappaanni marlunngorpallu juulip ulluisa 13-ianni neqerooruteqartoqassasoq Namminersorlutik Oqartussat tusagassiuutinut sapaatiummat nalunaarutigaat.

Timmisartuussinerni ukunani ilaasimasut misissortinnissaminnik kaammattorneqarput:

• Marlunngornermi 6. juuli 2021-mi GL 781 Københavnimiit Kangerlussuarmut. Issiavinni række 29-31-mi kiisalu række 41-43-mi issiasut tunillatsissimasunut qaninnerpaasimapput.
• Marlunngornermi 6. juulimi GL 427 Kangerlussuarmiit Narsarsuarmut. Timmisartoq Narsarsuarmut apuutinngilaq, aammalu Paamiut aqqusaarlugu Nuummut ingerlaqqilluni.
• Marlunngornermi 6. juuli 2021-mi GL 513 Kangerlussuarmiit Nuummut.
• Marlunngornermi 6. juuli 2021-mi GL 534 Kangerlussuarmiit Ilulissanut.
• Sisamanngornermi 8. juulimi GL 421 Nuummiit Narsarsuarmut.
• GL 4381 Narsarsuarmiit Qaqortumut (qulimiguulimmik).

Aamma akiuussuserneqarsimagaluaruit suli tunillanneqarsinnaallutillu tunillaasinnaagavit misissortikkiartornissannik kaammattorneqarputit.

Ulluni tulliuttuni misissuinissamut pilersaarutit imaapput:

Nuuk: 

• Inuit timmisartuni il.il. tunillatsissimasinnaasut nal. 10:30-miit 12:00-imut misissortissinnaapput.
• Ullut tallimassaanni misissortinnerit nalinginnaasut nalinginnaasumik 08:15-imiit 10:00-imut ammasarput.
• Misissuinerit Misissuivimmi, siornatigut Kalaaliaraasimasumi, Nuup qeqqani Brugsenip eqqaaniittumi ingerlanneqartarput.

Qaqortoq:

• Napparsimmavimmi misissuinissat nal. 09:00 ammassapput.
• Misissuineq nunap immikkoortuata napparsimmaviani ingerlanneqassaaq.

Ilulissat:

• Inuit timmisartuni il.il. tunillatsissimasinnaasut napparsimmavimmi nal. 13-imiit misissorneqarsinnaapput.
• Ullut tallimassaanni misissortinnerit nalinginnaasut nalinginnaasumik 09:00-imiit ammasarput.
• Misissuineq nunap immikkoortuata napparsimmaviani ingerlanneqassaaq.

Sumiiffinni allani ammarfissat pillugit najukkani peqqissaavinni saaffiginninnikkut paasiniaasoqarsinnaavoq.