Qaqortumi, Nuummi Ilulissanilu Covid-19-imik tunillatsissimasoqartoq
![Kø i testcenter](/sites/default/files/styles/image_934x467/public/article_images/testcenter_total.jpg?itok=au8w8GL6)
Inuit sisamat Covid-19-imik tunillatsissimasut ullumi arfininngornermi paasineqarput.
Danmarkimit Qaqortumut tikittup tunillatsissimasup inuk alla tunillassimavaa. Ilulissanut tikittoq tunillatsissimasoq paasineqarpoq, Nuummilu tikittoq tunillatsissimasoq paasineqarluni.
Namminersorlutik Oqartussat tusagassiuutinut nalunaarummi taama paasissutissiipput.
- Angerlarsimaannartussaatitaanermik unioqqutitsisoqarneranut takussutissaqanngilaq, kisiannili tunillatsissimasoq ataaseq silarlunnera pissutigalugu angalangaatsiartariaqarsimavoq, tassanilu tunillaasimasinnaanera ilimagineqartariaqarpoq, Namminersorlutik Oqartussat allapput.
Tunillatsissimasut perulunngillat, inissianilu namminerisamik pigisani maanna mattusimapput.
Deltaasinnaasoq
Tunillatsissimasut Covid-19 Deltamik tunillaatiasorujussuarmik tunillatsissimanersut suli ilisimaneqanngilaq. Taanna Danmarkimi tunillaassuunnerpaammat, Covid-19 Deltamik tunillaassortoqalersinnaanera ilimagineqartariaqartoq, Namminersorlutik Oqartussat allapput.
Tunillatsissimasut timmisartoqatigisimasaat Covid-19-imut ersiuteqalernissartik immikkut eqqumaffigissagaat nangillutik allapput.
Timmisartuussinerit uku pineqarput:
- Marlunngornermi 6. juuli 2021-mi GL 781 Københavnimiit Kangerlussuarmut. Issiavinni række 29-31-mi kiisalu række 41-43-mi issiasut tunillatsissimasunut qaninnerpaasimapput.
- Marlunngornermi 6. juulimi GL 427 Kangerlussuarmiit Narsarsuarmut. Timmisartoq Narsarsuarmut apuutinngilaq, aammalu Paamiut aqqusaarlugu Nuummut ingerlaqqilluni.
- Marlunngornermi 6. juuli 2021-mi GL 513 Kangerlussuarmiit Nuummut.
- Marlunngornermi 6. juuli 2021-mi GL 534 Kangerlussuarmiit Ilulissanut.
- Sisamanngornermi 8. juulimi GL 421 Nuummiit Narsarsuarmut.
- GL 4381 Narsarsuarmiit Qaqortumut (qulimiguulimmik).
Taavalu tunillatsissimasut ilaat Nuummi Hotel Hans Egedemi juulip ulluisa arferngannit arfineq-pingajuannut najugaqarsimavoq.
Inuk nunatsinni tunillatsissimasoq naammassilluni akiuussuserneqarsivoq. Naammassillutilli akiuussuserneqarsimasut tunillatsissinnaasut tunillaasinnaasullu naluneqanngilaq.
Taamaammat timmisartunut taaneqartunut ilaasimasut akiuussuserneqarsimagaluarunilluunniit Covid-19-imut ersiuteqarnerlutik eqqumaffigissagaat, ersiuteqarunillu peqqinnissaqarfimmut saaffiginnipallannissaat Namminersorlutik Oqartussat inassutigaat.
Misissortereersimanngitsullu ataasinngorpat misissortikkiartornissaat taakkua inassutigaat.
- Københavnimiit Kangerlussuarmut timmisartumut ilaallutik angalasimasut, issiavinni række-ni matuma siuliani taaneqartuni issiasimasut misissortereersimanngikkunik ataasinngornermi 12. juulimi misissorteqquneqarput.
- Tamanna aamma akiuussutissanik kapitissimasunut atuuppoq. Timmisartumut Dash 8-mut, matuma siuliani taaneqartumut ilaallutik angalasimasut ataasinngornermi 12. juulimi misissorteqquneqarput. Tamanna aamma akiuussutissanik kapitissimasunut atuuppoq, Namminersorlutik Oqartussat allapput.