Torontomi filmfestivalertoqarnerani filmit nunatsinneersut takutinneqassasut
- Suliniut una nunatsini isiginnaagassiortarnermut qanoq sunniuteqassanersoq pissangagisorujussuuara.
Isiginnaagassiamik ilitsersuisartoq, Marc Fussing Rosbach oqarpoq.
Taassuma isiginnaagassiat Akornatsinniittut – Kiinappalik (The Masked Man) 2020-meersoq aamma isiginnaagassiaq naatsuliaq Imajuik 2022-meersoq ilitsersuisuuffigai.
Isiginnaagassiat taakku marluk Canadami illoqarfissuarmi Torontomi ullumi aqagulu minifilmfestivalimi, Greenland Storiesimi ilaatigut takutinneqassapput.
Marc Fussing Rosbachip suleqatini quilertunartulersaarusiortartoq Malik Kleist peqatigalugu, isiginnaartut festivalip ingerlanerani apeqquteqarfigisinnaassagaatsik akueraat.
- Kalaallit filmiliortarnerisa nunarsuarmut tamarmut siammarterneqarnissaannut atatillugu 100 procentimik suliniarpunga, Marc Fussing Rosbach oqarpoq.
- Filmfestivalimut peqataanissamut akuersissuteqarneq nammineq attaveqarfigisanut pissarsiaqaataalluartarpoq. Suleqatigisinnaasarpassuarnut attaveqaateqarlertoqartarpoq, taanna oqarpoq.
Nunani avannarlernut nunarsuullu sinneranut isiginnaagassianik siammarterisartoq, filmiliornermik suliaqarfik, Sandrew Metronome filmfestivalertoqarnissaanut suliniuteqartuuvoq.
- Naak Kalaallit Nunaat nunarsuarmi qeqertat annerpaartarigaluaraat Europami USA-milu nunanit amerlasuunit ilisimaneqanngilluinnarpoq. Kulturip qanoq ittuunera ilisimanngilaat, Michael Rosenkilde Sandbrew Metronomemi tuniniaanermut pisiortornermullu akisussaasoq oqarpoq.
Nunatulli amerlanerpaanit immikkut ilisimasaqarfigineqanngitsumiit ukiortaap nalaani allannguisumik pisoqarpoq: tassa Donald Trump.
USA-p præsidentiata Kalaallit Nunaannik piserusulluni oqaaseqarneranit erneratalu kingorna Nuummut tikinneranit Kalaallit Nunaat nunarsuarmi qitiutallappoq.
- Kalaallit Nunaat pillugu oqaluttuat pitsaasut ilisimasat siammarternissaannut periarfissamik takusaqarpugut. Kalaallit Nunaanni aamma Kalaallit Nunaat pillugu isiginnaagassiortartunut isumassarsiorluartunut pikkorissunut tamanut, Michael Rosenkilde oqarpoq.
Taamaammat Sandrew Metronomep isiginnaagassiarpaalunnik – katillugit 17-iusut Kalaallit Nunaanni suliarineqartut aamma Kalaallit Nunaannut tunngasut Greenland Storiesip ataanut katersorpagut, taakkunanngalu arfineq-marluk Torontomi filmertarfimmi takutinneqassapput.
Isiginnaagassiat tamarmik Michael Rosenkildep oqarnera naapertorlugu, Kalaallit Nunaannut tunngasunik aamma nutaarsiassani atuakkanit allaanerusunik immikkut ittumik takunnissinnaatitsipput.
Trumpimut qujassut
Michael Rosenkildep takunninneratuulli, Donald Trumpip Kalaallit Nunaannik aqutsilernissamik kissaateqarneraqattaarneraniilli kalaallit filmiortarnerannut siuariarnermik pilersitsisoqarpoq.
Tamannalu ilitsersuisup Marc Fussing Rosbachip isumaqatigaa.
Taamaakkaluartorli isiginnaagassiarisani siulleq Akornatsinniittut – Tarratta Nunaanni nunanit allanit 2017-imiilli soqutigineqartoq takusareersimavaa.
Soqutiginninnerli annerulersoq taassuma maluginiarpaa.
- Pingaartumik piffissami matumani Trumpip Kalaallit Nunaannut tunngatillugu oqaluuserinningaatsiarnerani, taanna oqarpoq nangillunilu:
- Aallartikkamali Canadami, Finlandimi, Norgemi nunallu inoqqaavinit isiginnaagassiortartunik suleqateqartarpunga. Kisianni USA-mit nunaniillu allaniit soqutiginnittoqangaatsiartoq maanna malugisinnaavara, taanna oqarpoq.
Taanna ilaatigut Londonimi ilitsersuisumit atorfimmik marsimi neqeroorfigineqarsimavoq.
Nunani allani maluginiarneqarnerup saniatigut, nunatsinni politikerit filmiliorneq pillugu siuarsaanissamut ukiut kingulliit piareersaasiorput.
Nunarput siorna novembarip 20-ani filmiliornermut inatsisitaarpoq. Ungasinngitsukkullu Kalaallit Nunaanni Filminstituttip siulersuisuinut ilaasortassaat Naalakkersuisunit toqqarneqarput.
Marc Fussing Rosbach, ukiuni kingullerni nunatsinni filmiliorneq pillugu allanngortoqarneranik malugisaqarnikuuit?
- Aap, pissanganartorpassuarnik pisoqarnikuuvoq. Ammanerusumik suliaqarfiulernissaa aamma immiussinissatsinnut ikiorneqarnerulersinnaanissarput aningaasaateqarfinnullu qinnuteqarsinnaanngornissarput neriuutigaara, taanna akivoq.
Danmarkimiit filmiliornissamut suliniutinut tapiiffigineqarnissamut qinnuteqarsinnaaneq ukioq manna ammanerulereernikuusoq, taassuma misigaa.
- Danmarkimiit aningaasaliissutinik pissarsiniarnissaq siornatigut ajornakusoortarnikuuvoq. Qinnuteqarnissamut periarfissat maanna ammanerulertinnikuuaat. Taanna oqarpoq nangillunilu:
- Kisianni nunanit allanit tapiiffigineqarnissatsinnut periarfissaqarnerulernissarpu ilimagaara.
Nittartakkatigut aallakaatitsiviit atuagaateqarfiillu
Michael Rosenkildemut Sandrew Metronomemeersumit kalaallit filmiliaannik nunarsuarmut siaruarterinermik suliaqarneq aatsaat aallarnisaleruttorpoq.
- Sunniuteqangaatsiarneranik suli malugisaqanngilagut, kisianni soorunami neriuuteqarpugut – sulissutigeqqillugulu – arlaannik ukiuni tulliuttuni pisoqarumaartoq, taanna oqarpoq.
Massakkumuugallartoq Canadami filmit qanoq tigulluartigineqarnissaat pillugu misiginissaanut qilanaarpoq.
- Tassannga qanoq sunniuteqarumaarnersoq takunissaa pissanganaqaaq, taanna oqarpoq.
Filmit arfineq-marluk filmfestivalimiit filmit katersaniit filmit qulit sinneruttut ilanngullugit, nittartakkakkut aallakaatitsivitsigut atuagaateqarfitsigullu Canadami nunanilu allani, uani sapaatip-akunnerata naanerata kingorna aallakaatinneqassapput.
Ilaatigut Mexicomi, Indiami Tysklandimilu.
Tamatuma saniatigut Sandrew Metronome filmit katersat tv-eqarfinnut assigiinngitsunut tuninialeruttorpai, Michael Rosenkilde oqarpoq.
- Filmi Kalaallit Nunaanni susoqarnera pillugu tupinnartunik oqaluttualiornissamut periarfissaavoq. Aamma susoqarneranik malinnaarusuttorpassuaqassasoq isumaqarpunga, taanna oqarpoq.
