Quilertaammernartuliaq: Malik Kleist VLOG-iliortilluni isumassarsisoq
Alanngut Killinganni quilertaammernartuliatut isiginnaagassiamik isiginnaarsimasunut tamanut maanna nutaarsiassaqalerpoq.
Tassami Malik Kleistip quilertaammernartumik ukiup naajartornerani saqqummersitsinissani naatsorsuutigalugu oqaatigaa - tamatumuunalu June Shanna Holm suleqatigaa.
Isiginnaagassiaq qulequtserneqareerpoq, massa inissitassat assigiinngitsut suli inissinneqanngikkaluartut. Inngili Qernertoq imaluunnit danskisut Den Sorte Engel, isiginnaagassiaq taamak qulequtserneqarpoq.
Isiginnaagassiap suussusaa aamma inissinneqareerpoq.
Filmiliortartullu isiginnaagassiaq found footagetut suliaasoq oqaatigaa:
- Una genreq found footage gyserfilm imaakkami, soorlu piviusuusaartitaq. Imatut soorlu filmiliat nassaarineqarlutik. Taava kingorna paasillugu aatsaat susoqarsimanersoq, Malik Kleist oqarpoq.
VLOG-iliortoq
Isiginnaagassiamut nutaamut isumassarsiaq allaanerulaartumik pivoq.
Tassami Malik Kleist youtubemi Vlog-iliornermini, suliarisartakkaminnit allaanerusumik filmiliorniarluni isumassarseriataarpoq.
- Immaqa imaattuminngaak aallartippoq, una filmeq Blair Witch Project. Qanga 90-ikkunniinnguatsiarpoq 2000-ikkunniinngikkuni sanaaq. Tassanngaaniit aallaaveqarput taakkua genret. Taanna aallaavigalugu ingerlapparput una filmi, taanna oqarpoq.
Isiginnaagassiamik suliaqarneq 2020-mi juunimi aallartippoq, Malik Kleistip oqaluttuaq allallugu aallartippaa, June Shanna Holmilu isiginnaartitsisussanik ujartuilluni. Immiussinerit Nuummi aggustimi aallartipput.
Inngili Qernertoq Malik Kleistip quilertanartuliaata kingulliup Alanngut Killingannip 2023-mi nuannarineqarluarnerata kingunerani suliaavoq.
Isiginnaagassiaa nuannarineqarluartoq Nunat Avannarliit Siunnersuisoqatigiivisa Filmilianut nersornaasiuttagaannut innersuunneqartut arfinillit aamma akornanniippoq, nunatsinniillu nersornaammut tassunga aatsaat innersuussisoqarluni.
Innersuunneqarnerli nersorsaanersneqarneranik kinguneqanngilaq, taamaakkaluartorli tamanna Malik Kleistimut isumaqangaatsiarpoq:
- Kalaallit isiginnaagassiaannit siulliulluta innersuunneqarnerput soorunami isumaqartorujussuuvoq. Taamaammat siunissami amerlanerusut innersuunneqarnissaannut neriuuteqartoqarsinnaavoq. Tamanna soorlu matumanik ammaasoqarnertut ippoq. Taamaammat nuannaarutigingaatsiarparput.
Isiginnaagassiaq quilertanartuliaq maanna killorneqaleruttorpoq, naallu saqqummersitsinissamut suli ulluliisoqanngikkaluartoq 2024-p naanerani saqqummersinneqarnissaa anguniagaavoq.
