Alanngut killinganni kiisami takutinneqaqqaarmat isiginnaartut nilliasut
Filmiliortartup Malik Kleistip filmiliaa qiiaamisaarnartoq "Qaqqat Alanngui" ukiut aqqanillit matuma siorna saqqummermat Katuamut isiginnaariat amerlaqaat.
Taamanikkorniilli filmiliap nanginneqarnissaa anguniagaavoq.
Coronali pititseqimmat, ukiut aqqanillit qaangiunneranni nanginnera, "Alanngut Killinganni" aatsaat takuteqqaarneqarpoq.
Qaqqat alanngui 2011-mi saqqummerpoq.
Nanginnera Anganngut killinganni 2022-mi saqqummerpoq.
Nuuk International Film Festival ingerlanneqarnerani arfininngormat takuteqqaarneqarmat isiginnaariat ikinngeqaat issiaviit tamarmik ulikkaarluinnarsimapput.
Tamanna filmiliortup Malik Kleistip nuannaarutigeqaa.
- Ingerlalluartorujussuuvoq Katuaq ulikkaavilluni isiginnaartoqarpoq, inuillu nuannaartorujussuullutik. Illaqattaarlutik nilliallutillu tupaqattaarlutik pikkusuppaluttarlutillu pipput. Inuit nuannarerpaluttorujussuuaat filmeq.
"Qaqqat Alanngui" takutinneqarneraniit isiginnaarneqarnerpaat ilagalugu inunnit 19.000-nit isiginnaarneqarnikuuvoq.
Nanginnera "Alanngut killinganni" isiginnaarianit aamma tigulluarneqarsimaqisoq filmiliortoq oqarpoq.
- Allaffigiteqattaarpunga torraginerarlugu filmeq, taavalu assut nuannarillugu, assut qujallutik saqqummersimammat.
- Soorunami nuannersorujussuuvoq nuannarineqartoq filmeq, tassami nuannarineqarniassammat sanasaratsigu soorunami. Nuannaajallannartorujussuuvoq, tassuuna nukissamik katersinaqaaq.
Corona kinguarsaataasoq
Filmeq produktionsfirma PaniNoir Imalik Furos Imagelu suleqatigigalugit suliarineqarpoq. 2021-milu siullermeerluni takutinneqaqqaartussaagaluarpoq, coronali peqqutaalluni kinguartinneqarsimavoq.
- Saqqummiutiliivillugu siornaak novemberimi ulloq sioqqullugu aamma killilersuutit inisseqqeriasaaramik suna tamarmi matoqqilluni. Taava aatsaat tassa uani septemberimi takuteqqaarnissaa inissinnikuuvoq taamaasilluni.
Nunatsinni illoqarfinni assigiinngitsuni "Alanngut Killinganni" aamma takutinneqarnissaa pilersaarutaasoq, Malik Kleist oqarpoq.
- Siullermik biografillit Sisimiut Ilulissallu isumaqatigiissusiorfiginiarsarivakka. Kommuneqarfiit assigiinngitsut tutsaqallattaalerput, inissiiniarsarivugut qanoq pinerpa taanna nalunaasakkami.
Namminerli angallallugu takuteqattaarnissaa imminut akilersinnaanngitsoq filmiliortoq oqaluttuarpoq:
- Filmeq angalaarunnissaa ajornakusoortorujussuugami, isertitaqarpiarneq ajoratta. Isertitassaraluagut hotelinut timmisartumillu angalanermut tamarmik nunguttaramik.
Taavalu saniatigut suliffeqalernikuulluta, Malik Kleist KNR-imut oqarpoq.