Alanngut Killinganni Nunat Avannarliit Siunnersuisoqatigiiffiata Nordisk Rådip Filminut nersornaasiuttagaanut innersuunneqartoq
Nunat Avannarliit Siunnersuisoqatigiiffiata Nordisk Rådip Filminut nersornaasiuttagaanut kalaallit filmiliaat siullerpaamik innersuunneqarpoq.
Pineqarpoq filmi Alanngut Killinganni, siorna filmertarfimmi takutinneqaqqaarmalli inuppassuarnit isiginnaariarneqarsimasoq. Filmi taanna filmit nunanit avannarlerneersut filmiliaasa pitsaanersaattut akissarsinissamut innersuunneqartut arfinillit ilagaat, akissarsisitsinerlu oktobarip naanerani pissaaq.
Suulluunniit aatsaavissuaq pisinnaasarput maannalu Kalaallit Nunaat aatsaavissuaq Nordisk Råds Filmprisimut innersuunneqarpoq. Filmimi ilitsersuisup, Malik Kleistip, pisoq tulluusimaarutigaa.
- Assorujussuaq uatsinnut isumaqarpoq, kalaallit filmiliaanni uagut suliarput siullersaammat. Neriuginnassaagut siunissami amerlasuut aamma taama pineqartarumaartut. Allaanngilaq matu uagutsinnut ammaanneqartoq, Malik Kleist oqarpoq.
Innersuussassatut filmimik toqqaanermut atatillugu naliliisartut ima nassuiaapput: ”Inuit oqaluttualiaat qangalu oqaluttuatoqqat aallaavigalugillusooq Alanngut Killinganni ilitsersuisuusoq – nutaaliorluni oqaluttuariaaseq atorlugu filmiliorpoq, quianartunik quilertanartunillu akuleriiaarilluni Kalaallit oqaluttuariaasitoqaat malillugu filmi immikkuullarissumik suliaalluni.”
Aamma qanga pisimasut siunissamut ilaatinnerat – kalaallit kulturitoqaat attatiinnarlugu – Malik Kleistimut pingaartuusimavoq:
- Kalaallit kalaallit kulturiannik takutitsinissaq pingaartittuaannarpaat. Kisianni aamma takutikkusuttarparput, inuugatta illuikkani najugaqaannanngitsut. Tassaagattali nunarsuup sinnerasulli siuarsimatigisut. Aamma kalaallit ilisarnaataat soorlu qivittoq aamma takutikkaluarutsiguluunniit.
Filmi Malik Kleistip ersinartulersaarusiaata Qaqqat Alanngui-p nanginneraa. Ersinartulersaarummi 2011-imeersumi inuusuttut arfinillit asimi illuaqqamiitillutillutik qivittumit saassunneqartut filmiliarineqarput. Filmi taamani saqqummerami nunatsinni aamma nuannarineqaqaaq.