Nunatsinni filmiliornermut inatsisitaaq aningaasassaqarnerulernermik malitseqassagunartoq
Nunatta filmiliornermut inatsisissaatut siunnersuut Inatsisartut novembarip 20-ani akueraat. Nunarput taamaasilluni filmiliornermut inatsisitaarngaarpoq.
Tamannalu nunatsinni filmiliortartut nalliuttorsiutigaat.
- Nunatsinni filmiliortartut nuannapput. Immitsinnut allaffigerralluta pilluaqquvugut, nunatsinni filmiliortartut kattuffiata siulittaasua Klaus Georg Hansen nunatta filmiliornermut inatsisitaavata akuerineqarnerata kingunitsiannguagut oqarpoq.
Inatsisitaaq nunatsinni filmiliortartut piukkunnaatilioreersut ineriartorluarneroqqeriarnissaannut iluaqutaalertussasoq, taassuma qularinngilaa.
- Isumalerujussuuvoq, taanna oqarpoq.
Ingammik nunarput filmiliornermut institutitaarpat, tamanna aamma iluaqutaassaqisoq, taanna erseqqissaavoq.
- Nunatsinni filmiliortarneq - aningaasatigut - imminut akilersinnaaqqullugu filmiliornermut tunngasuni ataqatigiissaarisarfittaartariaqarpoq. Soorlu filmiliortartut nunanit allaneersut atassuteqarfigisinnaasaannik, taanna oqarpoq.
Nunatsinnimi filmiliornerup silarsuaa mannamut “tukattoq” aamma “piumasaarsorfiusoq”, Klaus Georg Hansen oqarpoq.
- Nunatsinnut immiussiartortut inuiaqatigiinnut tuttussanik akiuliuteqannguarnatik iluarisaannarminnik iliorsinnaapput. Taamaakkunnaartussanngorpoq, taanna oqarpoq.
Hollywoodimiit nunatsinnut immiussiartortalerataannaasut
Nunarput filmiliornermut institutitaarpat, tamanna filmiliortartutsinnuinnaanngitsoq nunatsinnili inuiaqatigiinnut tamanut aamma iluaqutaasussaassasoq, Film.gl-ip siulittaasua oqarpoq.
Aammali nunatsinni filmiliortartut pitsaanerusumik atugaqarnissaannik qularnaariinnarnani, filmiliornermut ataatsimiititaliarsuarmik pilersitsinissamut nunatsinnilu immiussinissamik nunani allani filmiliortartunut nittarsaassinermut tunngasuni akisussaasuusussaassaaq.
Iluatsissappat, tamanna aningaasaqarnerulernermik Klaus Georg Hansenip kinguneqassangatippaa.
- Hollywoodimeersunimmi nunatsinni ulluni arfineq-marluinnaagaluartuniluunniit immiussilersaartoqassagaluarpat, immiussinissaminnut qaammatinik pingasunik sioqqutsillutik tikittartussaassapput. Tassa akunnittarfimmiittartussaassapput, qulimiguulimmik attartorataannaasartussaassapput – tamanna kaaviiaartitaqarnerulissutaangaatsiartussaassaaq, taanna oqarpoq.
Assersuutigalugu nunani allani filmiliornermik suliaqarfinneersut nunatsinni immiussinermi aningaasartuutimik 25 procentiinik immiussereerneranni utertitsiffigineqartarnissaannik neqeroorfigineqartalersaarput.
Tassa filimiortartut nunanit allaneersut nunatsinni immiussisut aningaasartuutimik ilaanik utertitsiffigineqarsinnaasassapput.
Tamatumunngali piumasaqaatinik naammassisimatinnagit aningaasartuutimik ilaanik utertiffigineqarsinnaasassanngillat.
- Assersuutigalugu nunatsinni filmiliortartunik suleqateqarnissaat piumasaqaataasinnaavoq, Klaus Georg Hansen oqarpoq aammali oqaatigalugu taakkununnga aatsaat 2025-p ingerlanerani piumasaqaatiliortoqartussaassasoq.
Qanoq aningaasalersorneqartigissanersoq nalornissutaasoq
Filimiliornermut inatsisitaaq ajorisassaanngitsoq, Klaus Georg Hansen oqarpoq. Inatsisitaarli suli tassa piariivinngilaq.
Tassa nunarput filmiliornermut ukiortaami instituteqalissaaq, tassanili sulineq aatsaat 2026-mi aallartinneqartussaassalluni.
Tamanna ilaatigut qinersingajalernitsinnik insitutitaassallu qanoq aningaasalersorneqartigissaneranik suli isumaqatigiinniartoqannginneranik pissuteqarpoq.
- Taamaammat isumaqatigiittoqarnissaa qilanaareqaarput. Ajunngivissumimmi tassa inatsisitaarpugut sinaakkusiisumik 2025-milu piariivittussamik, Klaus Georg Hansen.
