Inuk Jørgensenip naatsuliaralugu filmiliaa nersornaaserneqarnissamut innersuunneqaqqittoq
Inuk Jørgensenip isiginnaagassiaa naatsoq "Entropy" ingerlalluarpoq.
Siullermik CPH:DOX-imi filmfestivalimi marsimi isiginnaartinneqaqqaarpoq. Tamatuma kingorna Montreal International First Peoples’ Festivalimi aggustimi pingaarnertut nersornaaserneqarpoq.
Filmi naatsuliaq maanna innersuunneqaqqippoq – tamatumuuna New Yorkimi Nordic International Film Festivalimi assilisaalluarnerpaatut nersornaaserniarneqarpoq. Tamanna festivalip nittartagaani allassimavoq, tassanilu nunani avannarlerni filmfestivalini Europap avataani pisuni annerpaasoq allassimalluni.
Inuppassuarnut annernartoq
”Entropy” nunatta kujataani silap pissusiata allanngoriartorneranut tunngassuteqartoq kalaallip isaanit isineqarpoq. Nerosrnaaserneqarsimasoq, isiginnaagassiami ilitsersuisoq, Inuk Jørgensen nammineerluni Qaqortumeersuuvoq.
Filmi naatsuliaq 10 minutsinik sivisussuseqarpoq, pingaarnertut inuttaqanngilaq, aamma silaannaap kissatsikkiartornera imarlu pillugu takussutissanik kisitsisinnillu ilaqarani. Naatsumik oqaatigalugu isiginnaagassiaq nalinginnaasumik takuneqartartumit allaaneruvoq.
Taamatullumi suliaanissaa siunniussimavaa.
- Uagut, tassa naggueqatigiit inuit, allatut oqaluttuariaaseqarneq ileqqoraarput, Inuk Jørgensen KNR-imut marsimi oqarpoq.
- Silap pissusiata allanngoriartornera qanoq kinguneqarnersoq takutissallugu siunniuppara. Inuppassuimmi tamanna eqqorneqaatigerujussuarpaat. Filmiliamali nunap inoqqaavisa isikkiviannik aallaaveqarnissaa pingaartissimaqaara.
Nunani avannarlerni isiginnaagassiortartut katersuuttut
Nordic International Film Festival qulissaanik aaqqissuunneqarpoq. Festivaalillu nunanit avannarlernit (aamma Kalaallit Nunaannit) isiginnaagassiortartut isiginnaagassiaminnik USA-mi takutitsillutillu tunisaqarsinnaanissaannik siunertaqarpoq.
Isiginnaagassiaq ”Entropy” sapaatip akunnerata tulliani, oktobarip 18-iani tallimanngornermi takutinneqassaaq.
