Kalaallip filmiliaa nersornaaserneqartoq
![](/sites/default/files/styles/image_934x467/public/2024-08/Entropy%20Still%202.jpg?itok=ViIRh-tF)
Kalaallit filmiliaat nunatsinnilu filmiliortartut nunani tamalaani ukiuni kingullerni maluginiarneqaqaat.
Kalaallillu filmiliortartut amerlanngitsut angisuunik anguniagaqakkajuttuusut ilaat nersornaasigaaqqeqqammerpoq.
Tassa Inuk Jørgensenip filmiliaa kingulleq naatsuusoq Entropy Montrealimi filmfestivalimi pingaarnertut nersornaasiuttakkamik sisamanngornermi aggustip 15-iani nersornaasigaavoq.
- Suliartortinnanga meeqqamalu atuariartuutinnginneranni videokkut inuulluaqqusissallunga ullaaralaaq makippunga. Qujanartumik taamaalinerani suli qaamasarpoq, imaallaat videokkut Atlantikoq akimorlugu inuulluaqqusinera iluatsippoq, nersornaasigaaqqammertoq nuannaarluni oqarpoq.
Inuup pinngortitallu imminnut ataqatigiinnerat filmimi sammineqartoq
Inuk Jørgensenimi filmiliani kingulleq naatsuusoq Entropy pillugu, Montreal International First Peoples’ Festival-imi 'Prix International De La Relève Main Film'-imik taallugu pingaarnertut nersornaasiuttakkamik nersornaaserneqaqqammerpoq.
Naliliisartut nersornaasiinerminnut ilaatigut ima tunngavilersuipput:
- Entropyp pinngortitaq oqalutsikkamiuk silap pissusiata allanngoriartornera inittortillugulu timikkut malunniunnerulersippaa.
Filmimi siulitta oqaluttuaatoqaannut utersaarluni pinngortitap inuullu imminnut ataqatigiinnerat sammivaa.
Silap pissusiata nunarsuaq tamakkerlugu allanngoriartornerata ajornartoortitsisarnera malugisaripput oqaluttuarineqarpoq.
Nersornaasigaasareertoq
Inuk Jørgensenili filmiliani Entropy pillugut aatsaat nersornaaserneqanngilaq. Entropymi filmfestivalit assigiinngitsut maannamut 20-init ikinnerunngitsuni takutinneqartareertoq arlaleriarluni nersornaaserneqarsimalereerpoq.
Taamaaginnassasimavorlu.
Tuluit Nunaanni Wildscreen Festival-imi pisussat ullumi aaqqissuunneqarsimalissapput, Entropylu filminik tassani nersornaasigassatut innersuussanut 33-usunut ilaavoq.
Nangeqattaartulianut aamma filmertarfinni/nittartakkami isiginnaagassianut Wildscreen Festivalimi, pinngortitaq pillugu filmfestivalini ataqqinaatilinni annersanut ilaasuusumi, nersornaasiuttagaq Panda Awards Oscaritut pinngortitaq pillugu filmiliortartut silarsuaanni isigineqarpoq.
Tassalu taamaattumik kalaallip filmiliaanut aatsaavissuaq nersornaasiisoqarpoq.