Nuuk International Film Festival aallartippoq: Takutitassavut aatsaat taama pitsaatigipput
- Nuannisarisitoq, asavassi. Inuulluaqqusilluta aaqqissuussisut akunniliisuat aaqqissuussisullu!
Tamanna kulturikkut illorsuarmi Katuami init ilaanni allagarsiivimmi elektroniskiusumi atuarneqarsinnaavoq, inuillu arlaqanngitsut Nuuk International Film Festivalip aallartinnissaanut tamaani piareersaaleruttorput.
Ukioq manna arfinilissaannik Nuuk International Film Festivalertoqarpoq.
Filmiliortartunik Nunavummeersunik qulingiluanik filmfestivalimi aatsaavissuaq peqataasoqarpoq.
Piviusulersaarut Tsumu, Inuk Silis Høeghip eqqumiitsuliaralugu filmiliaa The Green Land taavalu Zacharias Kunuup naatsuliaa Angakusajaujuq ukioq manna filmfestivalertitsinermi takutitassanut ilaapput.
Nuuk International Film Festivalimik aallarniisut KNR-ip ippassaq pingasunngornermi filmfestivalip aallartinnissaanut nalunaaquttap akunneri sisamat minutsillu 30-nnanngortut naapippai.
Katuamili filminik takutitsiffissartik festivalip ammaanersiornissaanut aqagunnerani siornatigut piareerneqareersimasartoq suli piareersarneqartoq, festivalimik aallarneeqataasut ilaata filimiliortartoq ilitsersuisorlu Pipaluk Kreutzmann Jørgensenip erseqqissaatigaa.
Angumersissaqqaarlutilli, Pipaluk Kreutzmann Jørgensen oqarpoq. Angumersippullumi.
Nuuk International Film Festivalimi ippassaq pingasunngornermi unnukkut aallartippoq.
Takutitassavut aatsaat taama pitsaatigisut
Ukiorlu manna Nuuk International Film Festivalimi takutitassavut aatsaat taama pitsaatigisut, filmfestivalimik aallarneeqataasut ilaat alla filmiliortartoq, Emile Hertling Péronard, oqarpoq.
- Filmit takutitassatut toqqagassatta akornanni pitsaasorpassuaqarpoq, ukiullu arfinillit matuma siorna filmfestivalertitsisalernitsinniit aatsaat taama pitsaatigisunik takutitassaqarpugut, taanna oqarpoq.
Piviusulersaarut Tsumu festivalip ammaanersiorneqarnerani takutinneqarpoq. Tasiilamilu inuusuit ikinngutigiit piviusulersaarummi tassani malinnaaffigineqarput. Inuusuillumi tusarneqarnissaat festivalimi qitiutilluinnaritsik, Pipaluk Kreutzmann Jørgensen nassuiaavoq.
- Inuusuimmi aamma tusarneqarnissaat pingaaruteqaqimmat Nuuk International Film Festivalertitsisarpugut.
Filimiliortartunik Akilinermeersunik suleqateqartut
Filmiliortartut Akilinermi Nunavumeersut qulingiluat ukioq manna Nuuk International Film Festivalimi peqataapput. Taakkulu peqataanissaat, festivalimik aallarniisut qilanaarisimaqaat.
- Assigiissuteqaqaagut. Oqaluttuarisaanikkut, kulturikkut ileqqutigullu assigiinnik tunuliaqutaqarpugut. Oqaluttuatigullumi aamma assigiiffippassuaqarpugut, taamaammat qanoq assigiiffeqartiginerluta filmiliatsinnik avitseqatigiinnikkut takullugulu ilisarisimasariinnerulersinnaavugut, Emile Hertling Péronard oqarpoq.
Nunatsinnilumi filmilortartoqarnerulernissaa Nuuk International Film Festivalimi aamma siunertarineqarpoq, ukiummi qulit kingumut qiviarutta nunatsinni filmiliortartut nunani allani filmiliortartuninngarnit ikinneerarsuupput.
- Ukiunut qulinut kingumut qiviarutta nunatsinni filmiliortartoqanngingajavillunilu Nuummi nunatsinnilumi sumiiffinni allani filmfestivalertoqartanngilaq. Taamammat nunatsinni filmfestivalertitsisarneq nutaajusorujussuuvoq. Neriuppunga ukiorpassuarni tulliuttuni suli Nuuk International Film Festivalertoqartassasoq, filmiliortartuusugummi nunatsinneersuusugut filmiliatsinnik allanut tassani takutitsillutalu avitseqatigiittaratta, Emile Hertling Péronard oqarpoq.
Filmit assigiinngitsut Nuummi Katuami sumiiffinnillu allani arfininngorpat tungaanut Nuuk International Film Festivalertoqarnerani takutinneqarlutillu allanik aaqqissuussisoqassaaq.